பிறப்பு சான்றிதழ் மோசடி வழக்கில், சமாஜ்வாதி கட்சி எம்.பி., திரு. ஆசம் கான், அவரது மனைவி மற்றும் மகனை, அடுத்த மாதம் 2-ம் தேதி வரை சிறையிலடைக்க நீதிமன்றம் உத்தரவிட்டுள்ளது.

உத்தர பிரதேச மாநிலம், ராம்பூர் தொகுதி எம்.பி.,யும், சமாஜ்வாதி கட்சி மூத்த தலைவருமான திரு. ஆசம் கான் மீது, நில அபகரிப்பு, ஆக்கிரமிப்பு என பல வழக்குகள் உள்ளன. இவருக்கு, தன்ஜீன் பாத்திமா என்ற மனைவியும், அப்துல்லா ஆசம் என்ற மகனும் உள்ளனர்.

எம்.எல்.ஏ.,வாக செயல்பட்ட திரு. ஆசம் கானின் மகன் திரு. அப்துல்லா ஆசம் மீதும், பிறந்த தின ஆவணங்களில் மோசடி செய்ததாக வழக்கு பதிவானது. மோசடியில் ஈடுபட்டது கண்டுபிடிக்கப்பட்ட பிறகு, எம்.எல்.ஏ., பதவியையும் அவர் இழந்து விட்டார். இதற்கி‌‌டையே, கடந்தாண்டு ஜூலையில், திரு. ஆசம் கான் மற்றும் அவரது குடும்பத்தினருக்கு எதிராக, 4-க்கும் மேற்பட்ட வழக்குகள் பதிவாகின. இதனால் நேரில் ஆஜராகும்படி, ராம்பூரில் உள்ள நீதிமன்றம் பலமுறை சம்மன் அனுப்பியது. ஆனால், அவர்கள் ஆஜராகவில்லை. அவர்களின் முன்ஜாமின் கோரிய மனுக்களும் தள்ளுபடி செய்யப்பட்டன.

நீதிமன்றத்தில் ஆஜராகாத நிலையில், வழக்கொன்றில், திரு. ஆசம் கான் மற்றும் அவரது குடும்பத்தினரை கைது செய்ய உத்தரவு பிறப்பிக்கப்பட்டன. மேலும், அவர்களது சொத்துகளை முடக்கவும் உத்தரவிடப்பட்டது. இந்நிலையில், மாவட்ட நீதிமன்றத்தில், திரு. ஆசம் கான், அவரது மனைவி திருமதி. தன்ஜீன் பாத்திமா மற்றும் மகன் அப்துல்லா ஆசம் கான் ஆகியோர் சரணடைந்தனர். அவர்களை, வரும் மார்ச் மாதம் 2-ம் தேதி வரை, நீதிமன்ற காவலில் சிறையிலடைக்க விதித்து நீதிமன்றம் உத்தரவிட்டனர்.