கொரோனா தடுப்பு நடவடிக்‍கையாக நாடு முழுவதும் அமலில் உள்ள 21 நாள் ஊரடங்கை நீட்டிக்கும் திட்டம் தற்போது இல்லை என மத்திய அரசு அறிவித்துள்ளது.

கொரோனா தடுப்பு நடவடிக்‍கையாக, கடந்த 25-ந் தேதி நள்ளிரவு முதல் நாடு முழுவதும் ஊரடங்கு உத்தரவு அமலுக்கு வந்தது. ஊரடங்கு உத்தரவால் அனைத்து தரப்பு மக்களுக்கும் சிரமங்கள் ஏற்பட்டுள்ள அதேவேளையில் அன்றாடம் கூலி வேலை செய்து பிழைப்போர், சிறு வியாபாரிகள் மற்றும் வெளி மாநில தொழிலாளர்கள் பெரிதும் பாதிக்கப்பட்டு இருக்கிறார்கள்.

இந்நிலையில், கொரோனா வைரஸ் பரவுவது அதிகரித்து இருப்பதாலும், நாட்டில் அசாதாரண சூழ்நிலை நிலவுவதாலும், வருகிற ஏப்ரல் 14-ந் தேதியுடன் முடிவடைய இருக்கும் ஊரடங்கை மேலும் நீட்டிக்க மத்திய அரச திட்டமிட்டு இருப்பதாக ஊடகங்களில் தகவல்கள் வெளியாயின.

இதை திட்டவட்டமாக மறுத்துள்ள மத்திய அரசு, 21 நாள் ஊரடங்கை மேலும் நீட்டிக்கும் எண்ணம் தற்போதைக்கு இல்லை என்று அறிவித்து உள்ளது. 21 நாள் ஊரடங்கு முடிவடையும்போது அதை மத்திய அரசு நீடிக்க இருப்பதாக வதந்திகள் பரவுவதோடு, சில ஊடகங்களிலும் தகவல்கள் வெளியாகி உள்ளன - இந்த வதந்திகளும், தகவல்களும் அடிப்படை ஆதாரம் இல்லாதவை என மத்திய அமைச்சரவை செயலாளர் ராஜீவ் குகா மறுத்துள்ளார்.