கொரோனா ஊரடங்கு காரணமாக, ரத்து செய்யப்பட்ட ரயில் டிக்கெட் பணத்தை திரும்பப் பெறுவதற்கான தேதிகள் அறிவிக்‍கப்பட்டுள்ளன.

நாடு முழுவதும் கொரோனா ஊரடங்கால் ரத்து செய்யப்பட்ட ரயில்களில் ரயில்வே கவுண்டர்களில் முன்பதிவு செய்தவர்களுக்கான பணம் இன்னும் திருப்பித் தரப்படவில்லை. இதனால் கடந்த மார்ச் 24ம் தேதிமுதல் வரும் ஜூன் 30ம் தேதி வரை, முன்பதிவு செய்தவர்கள் இன்று முதல், கவுண்டர்களில் பணத்தை திரும்பப்பெறலாம் என தெரிவிக்‍கப்பட்டுள்ளது.

ஏப்ரல் 1-ம் தேதி முதல் ஏப்ரல் 14-ம் தேதி வரை முன்பதிவு செய்தவர்கள், ஜூன் 3ம் தேதி முதல் பணத்தை திரும்பப் பெற்றுக்கொள்ளலாம் - ஏப்ரல் 15-ம் தேதி முதல் ஏப்ரல் 30ம் தேதி வரை முன்பதிவு செய்தவர்கள், ஜூன் 9ம் தேதி முதல், கவுண்டர்களில் பணத்தை திரும்பப் பெற்றுக்‍கொள்ளலாம் என்று அறிவிக்‍கப்பட்டுள்ளது.

மே 1ம் தேதி முதல் மே 15ம் தேதி வரை முன்பதிவு செய்தவர்கள், ஜூன் 16ம் தேதி முதல் பணத்தை திரும்பப் பெற்றுக்‍கொள்ளலாம் - மே 16ம் தேதி முதல் மே 31ம் தேதி வரை, முன்பதிவு செய்தவர்கள், ஜூன் 23ம் தேதி முதல் பணத்தை திரும்பப் பெற்றுக்‍கொள்ளலாம் - ஜூன் 1ம் தேதி முதல், ஜூன் 30ம் தேதி வரை முன்பதிவு செய்தவர்கள், ஜூன் 28ம் தேதி முதல் தங்கள் பணத்தை திரும்பப் பெற்றுக்‍ கொள்ளலாம் என ரயில்வே துறை தெரிவித்துள்ளது.

இந்த தேதிகளில் பணத்தை திரும்பப் பெற முடியாதவர்கள், பயணத்தேதியில் இருந்து 180 நாட்களுக்குள் எப்போது வேண்டுமானாலும் திரும்பப் பெற்றுக்கொள்ளலாம் என்றும் தெரிவிக்‍கப்பட்டுள்ளது.