இந்தியாவில் கொரோனா வைரஸ் பலருக்‍கும் பரவியதற்கு டெல்லியில் நடைபெற்ற தப்லீக் ஜமாத் மாநாடே காரணம் என மத்திய அரசு தெரிவித்துள்ளது.

மாநிலங்களவையில் இன்று தப்லீக் ஜமாத் தொடர்பாக எழுப்பப்பட்ட கேள்விக்கு மத்திய உள்துறை இணை அமைச்சர் திரு.ஜி.கிஷன் ரெட்டி, எழுத்துபூர்வமாக பதில் அளித்தார். கடந்த மார்ச் 29-ம் தேதி டெல்லி நிஜாமுதீன் பகுதியில் இருக்கும் தப்லீக் ஜமாத்தில் கொரோனா விதிகளை மீறி ஒன்றாகக் கூடியிருந்த 236 பேரை போலீசார் கைது செய்ததாகவும், 2 ஆயிரத்து 361 பேரை அங்கிருந்து அப்புறப்படுத்தியதாகவும் தெரிவித்தார். மூடப்பட்ட ஒரு அரங்கிற்குள் ஆயிரத்துக்கும் மேற்பட்டோர் எந்தவிதமான சமூக விலகலையும் கடைப்பிடிக்காமல், சானிடைசர் இல்லாமல், முகக்கவசம் அணியாமல் ஒன்றாகக் கூடியிருந்ததுடன், அங்கிருந்து நாட்டின் பல்வேறு பகுதிகளுக்‍கு சென்றது, நாடு முழுவதும் கொரோனா வைரஸ் பலருக்கும் பரவியதற்கு ஒரு காரணம் என்று கூறினார். இது தொடர்பாக, தப்லீக் ஜமாத்தின் தலைவர் மவுலானா முகமது சாத் மீது வழக்குப்பதிவு செய்து விசாரணையும் நடைபெற்று வருவதாக குறிப்பிட்டார்.