கொரோனா தொற்றால் பாதிக்கப்பட்டு சிகிச்சை பெற்று வந்த மத்திய ரயில்வே இணை அமைச்சர் சுரேஷ் அங்காடி சிகிச்சை பலனின்றி உயிரிழந்தார். இவரது மறைவுக்கு குடியரசுத் தலைவர் திரு. ராம்நாத் கோவிந்த‌், பிரதமர் திரு. நரேந்திர மோதி உள்ளிட்டோர் இரங்கல் தெரிவித்துள்ளனர்.

கர்நாடக மாநிலம், பெலகாவி தொகுதி எம்.பி.,யும், மத்திய ரயில்வே இணை அமைச்சருமான திரு. சுரேஷ் அங்காடி, கடந்த மாதம் 11-ம் தேதி கொரோனா தொற்றால் பாதிக்கப்பட்டு டெல்லி எய்ம்ஸ் மருத்துவமனையில் சிகிச்சை பெற்று வந்தார். ஒரு வாரமாக உடல்நிலை மோசமடைந்ததால் தீவிர சிகிச்சை பெற்று வந்த அவர், நேற்றிரவு சிகிச்சை பலனின்றி உயிரிழந்தார். உயிரிழந்த சுரேஷ் அங்காடிக்கு, மனைவியும், இரண்டு மகள்களும் உள்ளனர்.

ரயில்வே இணை அமைச்சர் சுரேஷ் அங்காடி மறைவுக்கு, குடியரசுத் தலைவர் திரு. ராம்நாத் கோவிந்த், பிரதமர் திரு. நரேந்திர மோதி, கர்நாடக முதலமைச்சர் திரு. எடியூரப்பா, மத்திய ரயில்வ அமைச்சர் திரு. பியுஷ் கோயல், பா.ஜ.க., தேசியத் தலைவர் திரு.ஜே.பி.நட்டா உள்ளிட்டோர் இரங்கல் தெரிவித்துள்ளனர். கொரோனா தொற்றால் உயிரிழக்கும் முதல் மத்திய அமைச்சர் சுரேஷ் அங்காடி என்பது குறிப்பிடத்தக்கது.