சட்டவிரோத பணப் பரிவர்த்தனை சட்டத்தின் கீழ் கர்நாடக மாநில காங்கிரஸ் கட்சி தலைவர் திரு.டி.கே சிவகுமார் நாளை நேரில் ஆஜராக அமலாக்கத்துறை சம்மன் அனுப்பியுள்ளது.

கர்நாடக மாநில காங்கிரஸ் கட்சியின் மூத்த தலைவர் திரு.டி.கே சிவகுமார் வீடு மற்றும் அலுவலகங்களில், கடந்த 2018-ம் ஆண்டு வருமானவரித்துறை அதிகாரிகள் நடத்திய சோதனையில், 10 கோடி ரூபாய்க்‍கும் அதிகமான ரொக்‍கப்பணம் மற்றும் கணக்‍கில் வராத ஆவணங்கள் கைப்பற்றப்பட்டன. இதுகுறித்து அமலாக்‍கத்துறை வழக்‍குப்பதிவு செய்து விசாரணை நடத்தி வரும் நிலையில், வழக்‍கில் மீண்டும் நேரில் ஆஜராக, டி.கே சிவகுமாருக்கு சம்மன் அனுப்பியுள்ளது.

காங்கிரஸ் ஒற்றுமை யாத்திரை கர்நாடகாவில் நடைபெற்று வரும் நிலையில், அதற்கான அனைத்துப் பணிகளையும் டி.கே சிவகுமார் மேற்கொண்டு வருகிறார். இந்தச்சூழலில் அமலக்கத்துறை சம்மன் அனுப்பியுள்ளது. இதனால் வழக்கு விசாரணைக்கு வேறொரு நாளில் ஆஜராக சம்மன் வழங்க வேண்டும் என டி.கே சிவகுமார் தரப்பில் மனு அளிக்கப்படவுள்ளதாக தகவல் வெளியாகிள்ளது.