மும்பை பங்குச்சந்தை குறியீட்டெண் சென்செக்ஸ் இரண்டாவது நாளாக இன்று காலை 35 ஆயிரம் புள்ளிகளை கடந்து புதிய உயர்வுடன் தொடங்கி சாதனை படைத்துள்ளது.

மும்பை பங்குச்சந்தையில் நேற்று காலை, வர்த்தகம் தொடங்கியது முதலே ஏற்றம் காணப்பட்டது. பிற்பகலில் 206 புள்ளிகள் உயர்ந்து, இதுவரை இல்லாத வகையில், 35 ஆயிரம் புள்ளிகளை கடந்து புதிய சாதனை படைத்தது. இதே போன்று தேசிய பங்குச்சந்தையில் நிஃப்டி 10,760 புள்ளிகளை கடந்தது.

இந்நிலையில், இரண்டாவது நாளாக இன்று காலை, சென்செக்ஸ் 35 ஆயிரம் புள்ளிகளை கடந்து புதிய உயர்வுடன் தொடங்கியுள்ளது. மும்பை பங்குசந்தை குறியீட்டு எண் சென்செக்ஸ் 395 புள்ளிகள் உயர்ந்து, 35,477 புள்ளிகளாகவும், தேசிய பங்குசந்தை நிஃப்டி 99 புள்ளிகள் அதிகரித்து 10,877 புள்ளிகளாகவும் இருந்தது.

தகவல் தொழில்நுட்பம், வங்கித்துறை பங்குகள் இன்றைய வர்த்தகத்தில் அதிகம் உயர்வு கண்டன. பல நிறுவனங்களின் காலாண்டு லாபம் அதிகரித்து இருந்ததாலும், பங்குகள் கூடுதல் லாபம் ஈட்டும் என்ற எதிர்பார்ப்பு காரணமாகவும், முதலீட்டு நிறுவனங்கள் பங்குகளை வாங்குவதில் ஆர்வம் காட்டி வருவதால் பங்குச்சந்தை புதிய உயர்வை தொட்டதாக பங்குச்சந்தை ஆலோசகர்கள் தெரிவித்தனர்.