புதுச்சேரியில் அரசுப் பேருந்து கட்டணம் திடீரென உயர்த்தப்பட்டுள்ளது. குறைந்தபட்ச கட்டணம் 5 ரூபாயிலிருந்து 7 ரூபாயாகவும், அதிகபட்சமாக 10 ரூபாயிலிருந்து 14 ரூபாயாகவும் உயர்த்தப்பட்டுள்ளது.

தமிழகத்தில் கடந்த சில மாதங்களுக்‍கு முன்பு பேருந்து கட்டணம் உயர்த்தப்பட்டபோது, புதுச்சேரியிலும் பேருந்து கட்டணத்தை உயர்த்த முடிவு செய்யப்பட்டது. ஆனால், இதற்கு பல்வேறு தரப்பிலிருந்து கடும் எதிர்ப்பு எழுந்ததால் கட்டண உயர்வு அறிவிப்பு தற்காலிகமாக நிறுத்தி வைக்‍கப்பட்டது.

இந்நிலையில், கடந்த வாரம் பேருந்து கட்டண உயர்வுக்‍கான கோப்பிற்கு துணைநிலை ஆளுநர் கிரண்பேடி ஒப்புதல் அளித்ததைத் தொடர்ந்து, புதுச்சேரி அரசு சார்பில் இயக்‍கப்பட்டு வரும் நகர்ப்புற மற்றும் புறநகர் பேருந்துக்‍கான கட்டணங்களை உயர்த்தி சாலை போக்‍குவரத்துக்‍கழகம் அறிவிப்பு வெளியிட்டுள்ளது.

அதன்படி, குறைந்தபட்ச கட்டணம் 5 ரூபாயிலிருந்து 7 ரூபாயாகவும், அதிகபட்சமாக 10 ரூபாயிலிருந்து 14 ரூபாயாகவும் கட்டணம் உயர்த்தப்பட்டுள்ளது. இந்த கட்டண உயர்வு நள்ளிரவுமுதல் அமலுக்‍கு வந்துள்ளது.