மக்‍களவை தேர்தல் முடிவடைந்த நிலையில், கர்நாடகாவில், விவசாயக்‍ கடன் தள்ளுபடி செய்யப்பட்ட சுமார் 14 ஆயிரம் விவசாயிகளின் வங்கி கணக்‍கில் இருந்து அந்த தொகை திரும்ப எடுக்‍கப்பட்டுள்ளதாக புகார் எழுந்துள்ளது.

மக்களவைத் தேர்தலுக்கு முன்னர், கடந்த ஏப்ரல் மாதம், கர்நாடக மாநிலத்தை விவசாயிகளின், 6 ஆயிரத்து 500 கோடி ரூபாய் அளவிலான விவசாய கடன்களை அம்மாநில அரசு தள்ளுபடி செய்தது. இந்நிலையில் கடந்த 3-ம் தேதி, 13 ஆயிரத்து 988 விவசாயிகளின் வங்கி கணக்‍கில் இருந்து, கடன் தள்ளுபடி செய்யப்பட்ட தொகை திரும்ப எடுக்‍கப்பட்டுள்ளது.

இதனால் அதிர்ச்சி அடைந்த விவசாயிகள், தேர்தலுக்கு முன்பாக விவசாய கடன் தள்ளுபடி என நிதி வழங்கிய முதலமைச்சர் திரு. குமாரசாமி அரசு, தேர்தல் முடிந்த பிறகு அந்த பணத்தை திரும்ப எடுத்துக் கொண்டதாக குற்றம் சாட்டியுள்ளனர். ஆனால் திரு. குமாரசாமி இந்த குற்றச்சாட்டுகளை மறுத்துள்ளார். மத்திய அரசின் கட்டுப்பாட்டில் உள்ள தேசியமயமாக்கப்பட்ட வங்கிகளே விவசாயிகளின் கணக்கில் இருந்து பணத்தை எடுத்துள்ளதாக அவர் தெரிவித்துள்ளார்.

இந்நிலையில், தகுதி வாய்ந்த விவசாயிகளுக்‍கு, கடன் தள்ளுபடி செய்ததாகவும், தகுதியற்றவர்கள் பெற்ற தள்ளுபடி தொகையை, அவர்களது வங்கி கணக்‍கில் இருந்து திரும்ப எடுத்துக்‍ கொண்டதாகவும் வங்கி அதிகாரிகள் கூறியுள்ளனர்.