பாரதிய ஜனதா மூத்த தலைவரும், முன்னாள் மத்திய அமைச்சருமான அருண்ஜேட்லியின் உடல், முழு அரசு மரியாதையுடன் தகனம் செய்யப்பட்டது.

முன்னாள் மத்திய அமைச்சர் அருண்ஜேட்லி, டெல்லி எய்ம்ஸ் மருத்துவமனையில் சிகிச்சை பலனின்றி நேற்று காலமானார். இதையடுத்து, டெல்லி பா.ஜ.க தலைமை அலுவலகத்தில் வைக்‍கப்பட்டிருந்த அருண்ஜேட்லியின் உடலுக்‍கு, மத்திய உள்துறை அமைச்சர் திரு.அமித்ஷா, பா.ஜ.க செயல் தலைவர் திரு.ஜே.பி.நட்டா, பாதுகாப்பு அமைச்சர் திரு.ராஜ்நாத்சிங், மத்திய அமைச்சர்கள் திரு.ஹர்ஷ் வர்தன், திரு.பியூஷ் கோயல், ஜார்கண்ட் முதலமைச்சர் திரு.ரகுபார் தாஸ் உள்ளிட்ட பலர் அஞ்சலி செலுத்தினர்.

தொடர்ந்து, அவரது உடல், இறுதிச்சடங்கிற்காக யமுனை ஆற்றங்கரைக்‍கு ஊர்வலமாக கொண்டு செல்லப்பட்டது. அங்குள்ள நிகம்போட் காட் பகுதியில் இறுதிச்சடங்கு நடைபெற்றது. 21 குண்டுகள் முழங்க, அரசு மரியாதையுடன் அருண்ஜேட்லியின் உடல் தகனம் செய்யப்பட்டது.

இறுதிச்சடங்கில் மத்திய அமைச்சர்கள், பாரதிய ஜனதா மூத்த நிர்வாகிகள் மற்றும் தொண்டர்கள் கலந்து கொண்டு இறுதி அஞ்சலி செலுத்தினர்.