நிழல் உலக தாதாவான தாவூத் இப்ராகிமின் உறவினருக்கு வீடு விற்பனை செய்ததாக தொடரப்பட்ட வழக்கில், வரும் வெள்ளிக்கிழமை நேரில் ஆஜராகும்படி, முன்னாள் மத்திய அமைச்சர் திரு. பிரஃபுல் பட்டேலுக்கு அமலாக்கத் துறை சம்மன் அனுப்பியுள்ளது.

மஹாராஷ்டிர மாநிலம், மும்பையில், கடந்த 2007-ம் ஆண்டு, தேசியவாத காங்கிரஸ் கட்சியைச் சேர்ந்த மூத்த தலைவர் திரு. பிரபுல் பட்டேலுக்கு சொந்தமான மில்லேனியம் டெவலப்பர்ஸ் என்ற நிறுவனம், 15 அடுக்குமாடி குடியிருப்பை கட்டியது.

இதில் இரண்டு தளங்களை, நிழல் உலக தாதா பயங்கரவாதி தாவூத் இப்ராகிமின் கூட்டாளியான இக்பால் மிர்ச்சிக்கு திரு. பிரபுல் பட்டேல் விற்பனை செய்தார். இதில், சட்ட விரோதமாக பணப் ‌பரிமாற்றம் நடைபெற்றதாகக் கூறி, அமலாக்கத் துறை அதிகாரிகள் விசாரணை நடத்தி வருகின்றனர்.

இந்நிலையில், இது தொடர்பான வழக்கு விசாரணைக்கு, வரும் 18-ம் தேதி நேரில் ஆஜராகும்படி, திரு. பிரபுல் பட்டேலுக்கு அமலாக்கத் துறை அதிகாரிகள் சம்மன் அனுப்பி உள்ளனர்.

சட்டப்பேரவை தேர்தல் நேரத்தில், எதிர்க்கட்சித் தலைவர்களை பா.ஜ.க., அரசு பழிவாங்கி வருகிறது என்று, காங்கிரஸ், தேசியவாத காங்கிரஸ் கட்சிகள் இதற்கு கண்டனம் தெரிவித்துள்ளன.