மஹாராஷ்டிர மாநிலத்தில் குடியரசுத் தலைவர் ஆட்சி அறிவிக்கப்பட்டுள்ளதற்கு தேசியவாத காங்கிரஸ் - காங்கிரஸ் கூட்டணி கண்டனம் தெரிவித்துள்ளது.

மஹாராஷ்டிர மாநிலத்தில், அரசியல் சாசனப்படி ஆட்சியமைக்‍க ஏதுவான சூழ்நிலை இல்லாத காரணத்தால், கு‌டியரசுத் தலைவர் ஆட்சிக்கு பரிந்துரைத்ததாக அம்மாநில ஆளுநர் திரு. பகத் சிங் கோஷ்யாரி தெரிவித்தார். இதற்கு, தேசியவாத காங்கிரஸ் - காங்கிரஸ் கூட்டணி கண்டனம் தெரிவித்துள்ளது.

மும்பையில், அடுத்தக்கட்ட நடவடிக்கை குறித்து, தேசியவாத காங்கிரஸ் கட்சி தலைவர் திரு. சரத் பவாருடன், காங்கிரஸ் கட்சி மூத்த தலைவர்கள் திரு. அகமது படேல், திரு. மல்லிகார்ஜூன கார்​கே ஆலோசனை நடத்தினர்.

கூட்டத்திற்கு பின்னர் செய்தியாளர்களை சந்தித்த காங்கிரஸ் மூத்த தலைவர் திரு. அகமது படேல், மஹாராஷ்டிர மாநிலத்தில், உச்ச நீதிமன்ற விதிமுறைகளை மீறி குடியரசுத் தலைவர் ஆட்சி அமல்படுத்தப்பட்டுள்ளதற்கு காங்கிரஸ் கட்சி கண்டனம் தெரிவித்து கொள்வதாகவும், சிவசேனா கட்சியுடன் பேச்சுவார்த்தை நடத்த உள்ளதாகவும் தெரிவித்தார்.

தங்களுக்கு எந்த அவசரமும் இல்லை என்றும், காங்கிரஸ் கட்சியுடனான ஆ‍லோசனைக்கு பிறகு, சிவசேனா கட்சிக்கு ஆதரவு குறித்து அறிவிக்கப்படும் என்றும் தேசியவாத காங்கிரஸ் கட்சி தலைவர் திரு. சரத் பவார் கூறினார்.