நாகை மாவட்டம் வேளாங்கண்ணி அருகே, அதிகாரிகள் கைவிரித்த நிலையில், விவசாயிகள் தங்கள் சொந்த முயற்சியில் தூர்வாரிய வாய்க்காலில் தண்ணீர் வந்ததால், அதனை மகிழ்ச்சியுடன் ஊர்வலமாக எடுத்துச்சென்று, கோயிலில் அபிஷேகம் செய்து வழிபட்டனர்.

வேளாங்கண்ணியை அடுத்த பிரதாபராமபுரம் கிராமத்திற்கு, திருநெல்லிக்காவல் பிரிவு 2 வடிகால் வாய்க்காலானது பாசன வசதி அளித்து வந்தது. நீண்ட நாட்களாக இந்த வாய்க்கால் தூர்வாராமல் இருந்ததை அடுத்து, அப்பகுதி மக்கள் பொதுப்பணித்துறையினரிடம் பலமுறை இதுகுறித்து மனு அளித்தும் நடவடிக்கை எடுக்கவில்லை என கூறப்படுகிறது. இதனால், காவிரி நீரானது இப்பகுதியினருக்கு கிடைப்பதற்கான சாத்தியக்கூறு இல்லாமல் இருந்து வந்தது. தற்போது வரை ஒரு சொட்டு காவிரி தண்ணீர் கூட கிடைக்காததால், சுமார் 500 ஏக்கர் மானாவாரி விவசாய நிலங்களில் குறுவை சாகுபடி செய்ய முடியாமல் விவசாயிகள் தவித்து வந்தனர். இதனையடுத்து, பிரதாபராமபுரம் கிராம மக்கள் ஒன்றிணைந்து, 7 கிலோ மீட்டர் கொண்ட வடிகால் வாய்க்கால் மற்றும் பழைய சந்திரமதி வாய்க்காலை தங்களது சொந்த முயற்சியில் தூர்வாரினர். இந்நிலையில், குறுவை சாகுபடிக்காக திறந்துவிடப்பட்ட காவிரி நீர், ஏற்வகாடு கதவணையிலிருந்து பிரதாபராமபுரம் பகுதியில் தூர்வாரப் பட்ட சித்த ஏரிக்கு வந்தடைந்தது. காவேரி நீரை, கிராம மக்கள் ஊர்வலமாக எடுத்துச் சென்று, அக்கிராமத்தில் உள்ள அகத்தீஸ்வரர் ஆலயத்தில் அபிஷேகம் செய்தனர். அதனைத் தொடர்ந்து மகா தீபாராதனை காண்பிக்கப்பட்டது.