விநாயகர் சதுர்த்தியையொட்டி, முதுமலையில் கோவிலை சுற்றியும், மணியடித்தும் 28 யானைகள் விநாயகரை வழிபாடு நடத்தின.

நீலகிரி மாவட்டம் முதுமலை புலிகள் காப்பகத்தில் தெப்பக்காடு மற்றும் அபயாரணயம் யானை முகாமில் 28 வளர்ப்பு யானைகள் பராமரிக்கப்பட்டு வருகின்றன. கடந்த 2 வருட காலமாக கொரோனா தொற்று காரணத்தினால் விநாயகர் சதுர்த்தி விழா மற்றும் இதர விழாக்கள் முதுமலை புலிகள் காப்பகத்தில் கொண்டாடப்படவில்லை. 2 வருடத்திற்கு பிறகு விநாயகர் சதுர்த்தி விழா நேற்று கொண்டாடப்பட்டது. அலங்கரிக்‍கப்பட்ட யானைகள், தெப்பக்காடு முகாமில் உள்ள விநாயகர் கோவிலில், தும்பிக்கையில் மணி அடித்தவாறு, மூன்று முறை கோயிலை சுற்றி வந்து யானைகள் விநாயகரை வழிபட்டன.

பின்னர் அனைத்து யானைகளும் தெப்பக்காடுக்‍கு அழைத்து வரப்பட்டு, பொங்கல், கரும்பு, மாதுளை பழம், வாழைப்பழம், கரும்பு, வெல்லம், ராகி உட்பட ஊட்டச்சத்து உணவுகள் வழங்கப்பட்டன. விநாயகர் முகம் கொண்ட யானைகள் விநாயகருக்கு பூஜை செய்ததை அங்கு வந்த சுற்றுலா பயணிகள் அனைவரும் ஆச்சர்யத்துடன் கண்டுகளித்தனர்.