கும்பகோணம் அருகே திருநாகேஸ்வரம் நாகநாத சுவாமி திருக்‍கோயிலில் மகா குடமுழுக்‍கு விழா இன்று வெகு விமரிசையாக நடைபெற்றது.

1500 ஆண்டுகள் பழமையானதும், அப்பர், சுந்தரர், ஞானசம்பந்தர் ஆகியோரால் தேவாரம் பாடல் பெற்றதுமான திருநாகேஸ்வரம் நாகநாதசுவாமி ஆலயம் மிகவும் பிரசித்தி பெற்றதாகும். இந்த ஆலயத்தில் ராகு பகவான், முழு உருவத்துடன் இரு மனைவியருடன் மங்கள ராகுவாக அருள்புரிகிறார். ராகு தோஷம், காலசர்ப்ப தோஷங்கள், களத்திர தோஷங்கள் விலகும் என நம்பப்படுகிறது. இப்பழமையான கோயிலின் குடமுழுக்கு விழா, 16 ஆண்டுகளுக்கு பிறகு இன்று நடைபெற்றது. யாகசாலை பூஜைகளில் சிவாச்சாரியார்கள், ஓதுவார்கள் கலந்துகொண்டனர். இன்று காலை 10.20 மணி அளவில், நாகநாத சுவாமி ஆலயத்திற்கு மகா குடமுழுக்கு விழா நடைபெற்றது. ஏழு ராஜகோபுரங்கள் 5 மூல விமானங்களில் வேதமந்திரங்கள் முழங்க, சிவாச்சாரியார்கள் கோவில் கலசங்களுக்கு புனித நீரால் குடமுழுக்கு செய்தனர்.

இக்கோவிலுக்‍கு பக்‍தர்களின் காணிக்கையாக 4 கோடி ரூபாய் மதிப்பில் திருப்பணி செய்யப்பட்டது. கொரோனா பரவல் தடுப்பு நடவடிக்‍கையாக, கும்பாபிஷேக விழா முடிந்த பின்னரே பக்‍தர்கள் கோயிலில் தரிசனம் செய்ய அனுமதிக்‍கப்பட்டனர்.