திருவாரூர் ஸ்ரீதியாகராஜ சுவாமி ஆலயத்தில் 3 ஆண்டுகளுக்கு பிறகு நடைபெறும் தெப்பத்திருவிழாவில் பல்லாயிரக்கணக்கானோர் பங்கேற்று சுவாமி தரிசனம் செய்தனர்.

தென்னிந்தியாவிலேயே மிகப்பிரமாண்டமான தெப்பம் என போற்றப்படும் திருவாரூர் ஸ்ரீதியாகராஜ சுவாமி ஆலயத்தின் 3 நாள் தெப்பத்திருவிழா நேற்று தொடங்கியது. இந்த தெப்ப ​திருவிழாவை காண பல்வேறு மாவட்டங்களில் இருந்து திரளான பக்தர்கள், பொதுமக்கள் திரண்டனர். இந்த தெப்பத்திருவிழா ஸ்ரீதியாகராஜ சுவாமி ஆலயத்தின் கமலாயத்திருக்குளத்தில் நடைபெறுகிறது. முதலில் ஸ்ரீகல்யாணசுந்தரேசர் சுவாமி எழுந்தருள அங்கு விஷேச தீபாராதனை நடைபெற்றது. இதனை தொடர்ந்து குளத்தின் 4 கரைகள் வழியாக தெப்பத்தில் வலம்வந்தபடி சுவாமி பக்தர்களுக்கு அருள்பாலித்தார். நாளை வரை 3 நாட்கள் நடைபெறும் இத்தெப்பத்திருவிழா நாள்தோறும் தினசரி இரவு 8 மணிக்கு தொடங்கி விடியவிடிய நடைபெறும். மின்னொளியில் மிளிரும் தெப்பத்தின் உள்ளே சுமார் 400 பேர் வரை அமரலாம். தெப்பம் நீரில் மிதந்து வரும் அழகை குளத்தின் 4 கரைகளிலும் அமர்ந்து பல்லாயிரக்கணக்கான பக்தர்கள், கண்டுகளித்து சுவாமியை வழிபட்டனர்.