திருப்பதி ஏழுமலையான் கோவில் பிரம்மோற்சவத்தின் நிறைவாக இன்று, புஷ்கரணியில், சக்கரத்தாழ்வார் தீர்த்தவாரி நடைபெற்றது. அப்போது பல்லாயிரக்‍கணக்‍கான பக்‍தர்கள் புனித நீராடி வழிபட்டனர்.

திருப்பதி ஏழுமலையான் கோவில் பிரம்மோற்சவம் இன்று நிறைவு பெறுகிறது. இதனையொட்டி இன்று காலை கோவில் திருக்குளமான புஷ்கரணியில் சக்கரத்தாழ்வார் தீர்த்தவாரி நடைபெற்றது. முன்னதாக ஸ்ரீதேவி பூதேவி சமேத, மலையப்ப சுவாமி, சக்கரத்தாழ்வார் ஆகிய உற்சவர்கள் கோவிலில் இருந்து புறப்பட்டு முக மண்டபத்தை அடைந்தனர். அங்கு உற்சவர்களுக்கு சிறப்பு பூஜைகள், அபிஷேக ஆராதனைகள் நடைபெற்றன. தொடர்ந்து சக்கரத்தாழ்வாரை கோவில் திருக்குளத்துக்குள் எடுத்து சென்ற அர்ச்சகர்கள், மூன்று முறை நீரில் மூழ்க செய்து சக்கரத்தாழ்வார் தீர்த்தவாரி நடத்தினர். திருக்குளத்தின் நான்கு புறங்களிலும் காத்திருந்த பல்லாயிரக்கணக்கான பக்தர்கள் திருக்குளத்தில் மூழ்கி புனித நீராடினர். தொடர்ந்து உற்சவமூர்த்திகள் மாடவீதியில் வழியாக சென்று கோவிலை அடைந்தனர். ஏழுமலையான் கோவில் பிரம்மோற்சவம் நிறைவடைய இன்று மாலை கொடி இறக்‍கம் நடைபெற உள்ளது.