மத நல்லிணக்கத்தை போற்றும் வகையில், கன்னியாகுமரி மாவட்டம் பள்ளியாடியில் நடைபெற்ற 450-வது ஆண்டு சமபந்தி விழாவில் மும்மதத்தினர் பங்கேற்று வழிபாடு நடத்தி உணவருந்தினர்.

கன்னியாகுமரி மாவட்டம் பள்ளியாடியில் உள்ள பழைய பள்ளி திருத்தலம் 500 ஆண்டுகள் பழமை வாய்ந்ததாகும். பண்டைய மன்னர்கள் காலத்தில் இந்த பகுதி மக்கள் கொடிய நோயால் ஒன்றால் அவதிபட்டனர். நீண்ட நாட்களாக இந்நோய்க்கு தீர்வு கிடைக்கவில்லை. பள்ளியாடி மற்றும் சுற்றுவட்டாரப் பகுதியில் உள்ள இந்து, கிறிஸ்துவ, முஸ்லீம் மதத்தினர் ஒன்றிணைந்து வழிபாடு நடத்தியதின் விளைவாக கொடிய நோயிலிருந்து விடுபட்டனர். இதனைத் தொடர்ந்து, ஆண்டுதோறும் பங்குனி மாதம் முதல் திங்கட்கிழமை பழைய பள்ளி திருத்தலத்தில் மாபெரும் சமபந்திவிழா நடைபெறுவது வழக்கம். இந்த வருடம் 450-வது ஆண்டு விழா என்பதால் மிகவும் பிரம்மாண்டமான முறையில் நடைபெற்றது. இதில், மும்மதத்தினரும் கொண்டுவந்த காய்கறிகள், அரிசி உள்ளிட்டவற்றால் சமையல் செய்து, சமபந்தி விழாவில் உணவு பறிமாறப்பட்டது. மதநல்லிணக்கத்துக்கு எடுத்துக்காட்டாக கொண்டாடப்பட்ட இந்த விழாவில் ஆயிரக்கணக்கானோர் கலந்துகொண்டனர்.