வைதீஸ்வரன் கோயிலுக்கு பாதயாத்திரையாக செல்லும் ஆயிரக்கணக்கான பக்தர்களுக்கு கும்பகோணம் பகுதியில் பல்வேறு இடங்களில் உணவு, குடிநீர் உள்ளிட்டவற்றை ஆன்மீக அமைப்புகளும், தொண்டுநிறுவனங்களும் வழங்கி வருகின்றன.

பிரசித்தி பெற்ற செவ்வாய் பரிகாரத் தலமான வைத்தீஸ்வரன் கோயிலில் உள்ள வைத்தியநாத சுவாமி ஆலயத்தில், ஆண்டுதோறும் பங்குனி மாத கடைசி செவ்வாய் கிழமையன்று சிறப்பு பூஜைகள் நடத்தப்படுவது வழக்கம். அந்த வகையில், நாளை பங்குனி மாத வழிபாடு நடைபெறவுள்ளது. இதில் பங்கேற்பதற்காக, புதுக்கோட்டை, தஞ்சை, அரியலூர், திருச்சி ஆகிய மாவட்டங்களை சேர்ந்த ஆயிரக்கணக்கான பக்தர்கள் விரதம் மேற்கொண்டு பாதயாத்திரையாக வைத்தீஸ்வரன் கோயில் நோக்கி வந்த வண்ணம் உள்ளனர். இவ்வாறு வரும் பக்தர்களுக்கு கும்பகோணத்தை ஒட்டியுள்ள பல்வேறு இடங்களில் உணவு, குடிநீர், மோர், இனிப்பு போன்றவற்றை ஆன்மீக அமைப்புகள் வழங்கி வருகின்றன.

இதேபோல், திருவிடைமருதூர், ஆடுதுறை, திருப்புவனம் போன்ற பகுதிகளிலும் பாதயாத்திரையாக செல்லும் பக்தர்களுக்கு உணவு, சிற்றுண்டி, குடிநீர் உள்ளிட்டவைகள் வழங்கப்பட்டு வருகின்றன.