காஞ்சிபுரத்தில், தொடர்ந்து 48 நாட்களாக நடைபெற்று வந்த அத்திவரதர் வைபவம் நிறைவு பெற்றதையடுத்து, வரதராஜப்பெருமாள் திருக்கோவிலின் அனந்தசரஸ் திருக்குளத்தில் உள்ள நீராழி மண்டபத்திற்குள் அத்திவரதர் மீண்டும் வைக்கப்பட்டார்.

காஞ்சிபுரம் வரதராஜப்பெருமாள் திருக்கோவிலில் 40 ஆண்டுகளுக்கு ஒருமுறை நடைபெறும் அத்திவரதர் வைபவம், கடந்த மாதம் 1-ம் தேதி தொடங்கியது. ஜூலை 31-ம் தேதிவரை சயனக் கோலத்தில் காட்சியளித்த அத்திவரதர், இம்மாதம் 1-ம் தேதிமுதல், நின்ற கோலத்தில், பக்தர்களுக்கு அருள்பாலித்தார். விழாவின் 47-வது நாளான நேற்று, அத்திவரதர் வெந்தய நிற பட்டாடையும், ரோஜா நிற அங்கவஸ்திரமும் அணிந்து பக்தர்களுக்கு அருள்பாலித்தார். நேற்றுவரை ஒரு கோடிக்கும் அதிகமான பக்தர்கள், அத்திவரதரை தரிசனம் செய்தனர். பக்தர்கள் கூட்டத்திற்கு ஏற்றவாறு, 48ம் நாளான இன்று அதிகாலை வரை அத்திவரதரை தரிசிக்க ஏற்பாடு செய்யப்பட்டிருந்தது.

இந்நிலையில், இன்று மாலை, ஸ்தானிகர்கள் உள்ளிட்ட திருக்கோவில் நிர்வாகிகள் அத்திவரதரை தரிசனம் செய்தனர். இதனைத் தொடர்ந்து, அருள்மிகு வரதராஜபெருமாள் திருக்கோயில் உற்சவரான தேவராஜபெருமாள் அத்திவரதரை தரிசிக்கும் வைபவம் நடைபெற்றது. பின்னர் சிறப்பு பூஜைகள் நடத்தப்பட்டன. அத்திவரதரை மீண்டும் திருக்குளத்தில் வைப்பதற்கான ஆகம ரீதியான நடைமுறைகள் மேற்கொள்ளப்பட்டு வருகின்றன. இதையடுத்து, கோவிலின் அனந்தசரஸ் திருக்குளத்தில் உள்ள நீராழி மண்டபத்தில் இன்று நள்ளிரவு அத்திவரதர் வைக்கப்பட்டார். இதனையடுத்து, 40 ஆண்டுகளுக்குப் பின்னர், 2059-ம் ஆண்டு அத்திவரதர் மீண்டும், வெளியே கொண்டுவரப்பட்டு, பக்தர்களுக்கு அருள்பாலிப்பார்.