திருப்பதி தேவஸ்தான அறங்காவலர் குழுவில், ஓ. பன்னீர் செல்வத்தின் பினாமி என கூறப்படும் சேகர் ரெட்டிக்கு சிறப்பு அழைப்பாளர் பதவி வழங்கப்பட்டுள்ளது.

திருப்பதி அறங்காவலர் குழுவில் ஏற்கனவே இடம்பெற்றிருந்த தொழிலதிபர் சேகர் ரெட்டி, கடந்த 2016ம் ஆண்டு வருமான வரித்துறை சோதனையில் சிக்கியதை அடுத்து அறங்காவலர் குழுவில் இருந்து நீக்கப்பட்டார். இந்நிலையில், கடந்த 2 மாதங்களுக்கு முன்னர் ஆந்திர முதலமைச்சர் ஜெகன் மோகன் ரெட்டி தன்னுடைய உறவினரான ஒய்.வி சுப்பா ரெட்டி என்பவரை திருப்பதி தேவஸ்தான அறங்காவலர் குழுவின் தலைவராக நியமித்தார். மேலும், தமிழகத்தைச் சேர்ந்த உளுந்தூர்பேட்டை சட்டமன்ற உறுப்பினர் குமரகுரு, இந்திய சிமெண்ட்ஸ் குழும தலைவர் சீனிவாசன் உள்பட மொத்தம் 29 பேரை அறங்காவலர் குழு உறுப்பினராக ஆந்திர மாநில அரசு நியமித்தது.

இதனைத் தொடர்ந்து தேவஸ்தான முன்னாள் அறங்காவலர் குழுவில் இருந்தவரும், ஓ. பன்னீர் செல்வத்தின் பினாமி என கூறப்படுபவருமான தொழிலதிபர் சேகர் ரெட்டி உள்பட 7 பேரை ஆந்திர அரசு சிறப்பு அழைப்பாளராக நியமித்து உத்தரவு பிறப்பித்துள்ளது. சிறப்பு அழைப்பாளர்களுக்கு தேவஸ்தான அறங்காவலர் குழு கூட்டத்தில் கொண்டுவரப்படும் தீர்மானங்கள் மீது வாக்களிக்கும் உரிமை கிடையாது என்பது குறிப்பிடத்தக்கது.