திருவாரூர் மாவட்டம் கூத்தனூர் சரஸ்வதி ஆலயத்தில், சரஸ்வதி பூஜையை முன்னிட்டு திரளான பக்‍தர்கள் சிறப்பு வழிபாடு நடத்தினர்.

கல்வி கடவுளாக போற்றப்படும் சரஸ்வதிக்‍கென நாட்டிலேயே தனி ஆலயம், திருவாரூர் மாவட்டம் நன்னிலம் அருகே கூத்தனூரில் அமைந்துள்ளது. இத்திருத்தலத்தில் தான் கவிச்சக்‍கரவர்த்தி ஒட்டக்‍கூத்தருக்‍கு சரஸ்வதி அருள்பாலித்ததாக கூறப்படுகிறது. இந்நிலையில் சரஸ்வதி பூஜையையொட்டி, அதிகாலையில் இருந்தே அம்மனுக்‍கு சிறப்பு அபிஷேகம் மற்றும் ஆராதனைகள் நடைபெற்றன. இத்தினத்தில் மட்டுமே அம்மன் பாதங்களில் பக்தர்கள் தங்களது கரங்களால் மலர் தூவி பூஜை செய்ய அனுமதிக்‍கப்படுகிறது. எனவே இன்று ஏராளமானோர் நீண்ட வரிசையில் காத்திருந்து தரிசனம் செய்து வருகின்றனர். பெற்றோர் தங்கள் குழந்தைகளை மடியில் வைத்து அரிசியில் தமிழின் முதல் எழுத்தான `அ` எழுத்தை எழுதி, கல்வியில் மேன்மை அடைய பிரார்த்தனை செய்தனர்.

சரஸ்வதி பூஜையை முன்னிட்டு, நாகை மாவட்டம் மயிலாடுதுறை அய்யாரப்பர் ஆலயத்தில் அமைந்துள்ள சரஸ்வதி சன்னதியில், சிறப்பு யாகம் மற்றும் அபிஷேக ஆராதனைகள் நடைபெற்றன. இதில் திரளான பக்தர்கள் பங்கேற்று வழிபாடு செய்தனர்.