ஐ.பி.எல். கிரிக்‍கெட் தொடரின் முதல் குவாலிபயர் ஆட்டத்தில் வெற்றி பெற்ற குஜராத் அணி, நேரடியாக இறுதிப் போட்டிக்‍கு தகுதி பெற்று சாதனை படைத்தது.

15-வது ஐ.பி.எல். கிரிக்கெட் தொடர் இறுதி கட்டத்தை நெருங்கி விட்டது. இந்தநிலையில், கொல்கத்தாவில் உள்ள ஈடன் கார்டன் மைதானத்தில் நடைபெற்ற முதலாவது தகுதி சுற்று ஆட்டத்தில் குஜராத் டைட்டன்ஸ் அணியும் - ராஜஸ்தான் ராயல்ஸ் அணியும் பலப்பரீட்சை நடத்தின. முதலில் விளையாடிய ராஜஸ்தான் அணியில் ஜோஸ் பட்லர், கேப்டன் சஞ்சு சாம்சன் ஆகியோர் அதிரடியாக விளையாடினர். இதனால் 20 ஓவர்கள் முடிவில் ராஜஸ்தான் அணி 6 விக்கெட் இழப்பிற்கு 188 ரன்கள் குவித்தது.

இதையடுத்து கள​மிறங்கிய குஜராத் அணி வீரர்கள் தொடக்‍கம் மு​தலே அதிரடியாக ஆடினர். சுப்மன் கில், மேத்யூவ் வேட் தலா 35 ரன்களில் ஆட்டமிழந்தனர். இதையடுத்து ஹர்த்திக்‍ பாண்டியாவும், டேவிட் மில்லரும் ​ஜோடி சேர்ந்து ரன் குவிக்‍க ஆரம்பித்தனர். கடைசி ஓவரில் வெற்றிக்‍கு 16 ரன்கள் தேவைப்பட்ட நிலையில், மில்லர் தொடர்ந்து 3 சிக்‍ஸர்களை பறக்‍கவிட்டு வெற்றிக்‍கு வித்திட்டார். இதன்படி 7 விக்கெட்கள் வித்தியாசத்தில் ராஜஸ்தான் அணியை வீழ்த்தி குஜராத் அணி இறுதி போட்டிக்கு தகுதி பெற்றது.