தென்னாப்பிரிக்காவில் நடைபெற்ற 19 வயதுக்கு உட்பட்டோருக்கான மகளிர் டி20 உலகக் கோப்பையை இந்திய அணி வென்று சரித்திர சாதனை படைத்துள்ளது.

முதல்முறையாக நடைபெற்ற இத்தொடரின் ஆரம்பம் முதலே அசத்தலான ஆட்டத்தை வெளிப்படுத்திய ஷபாலி வர்மா தலைமையிலான இந்திய மகளிர் அணி, இறுதிப் போட்டியில் பலம் வாய்ந்த இங்கிலாந்து அணியை எதிர்கொண்டது. போட்செஃப்ஸ்ட்ரூம் நகரில் நடந்த போட்டியில், டாஸ் வென்ற இந்திய அணி, பந்துவீச்சை தேர்வு செய்தது. அதன்படி, முதலில் பேட்டிங் செய்த இங்கிலாந்து அணி, இந்திய வீராங்கனைகளின் மிரட்டலான பந்துவீச்சை எதிர்கொள்ள முடியாமல் 17 புள்ளி ஒன்று ஓவரில் 68 ரன்களுக்கு சுருண்டது. இந்திய அணி தரப்பில் டைட்டாஸ் சாது, அர்ச்சனா தேவி, பார்ஷவி சோப்ரா ஆகியோர் தலா 2 விக்கெட்டுகளை வீழ்த்தி அசத்தினர். இதனையடுத்து, 69 ரன்கள் எடுத்தால் வெற்றி என்ற எளிய இலக்குடன் களமிறங்கிய இந்திய மகளிர் அணி, 14 ஓவர்களிலேயே 3 விக்கெட்டுகளை இழந்து வெற்றி இலக்கை எட்டியது. அதிகபட்சமாக சவுமியா திவாரி கடைசிவரை ஆட்டமிழக்காமல் 24 ரன்கள் எடுத்து வெற்றிக்கு வித்திட்டார். இதன்மூலம், 7 விக்கெட் வித்தியாசத்தில் அபார வெற்றிபெற்ற இந்திய மகளிர் அணி, முதல்முறையாக உலகக் கோப்பையை வென்று வரலாறு படைத்துள்ளது. 2007ம் ஆண்டு தோனி தலைமையிலான இந்திய ஆடவர் அணி, புதிதாக அறிமுகப்படுத்தப்பட்ட முதல் டி-20 உலகக் கோப்பையை வென்று சரித்திரம் படைத்தது. அதன்பின்பு, தற்போது ஷபாலி வர்மா தலைமையிலான ஜுனியர் இந்திய மகளிர் அணி, முதல் டி-20 உலகக் கோப்பையை வென்று சாதனை படைத்துள்ளது. உலகக் கோப்பையை வென்ற இந்திய மகளிர் அணிக்கு, குடியரசுத் தலைவர், பிரதமர் உள்ளிட்ட அரசியல் தலைவர்கள் மற்றும் கிரிக்கெட் பிரபலங்கள் உட்பட பல்வேறு தரப்பினரும் வாழ்த்துக்களை தெரிவித்து வருகின்றனர்.