இங்கிலாந்து நாட்டின் லண்டன் நகரில் Queens கிளப் டென்னிஸ் தொடரின் 2-வது சுற்று ஆட்டங்கள் நேற்று நடைபெற்றன. இதில் முதலில் நடைபெற்ற போட்டி ஒன்றில், தரவரிசையில் 7-வது இடத்தில் உள்ள செக்குடியரசின் தாமஸ் பெர்டிச், கனடாவின் இளம் வீரர் Denis Shapovalov-வை எதிர்கொண்டார். மிகவும் விறுவிறுப்பாக நடைபெற்ற இப்போட்டியில், தனது அனுபவ ஆட்டத்தை வெளிப்படுத்திய பெர்டிச், 7-6, 6-7, 7-5 என்ற செட்கணக்கில் Shapovalov-வை போராடி வென்று காலிறுதிக்கு முன்னேறினார்.

மற்றொரு 2-வது சுற்று ஆட்டத்தில், Queens கிளப் தொடருக்கான தரவரிசையில் 6-வது இடத்தில் உள்ள பல்கேரியாவின் டிமிட்ரோவும், ஃபிரான்சின் ஜுலியின் பென்னெட்டோவும் மோதினர். இப்போட்டியில், முதல் செட்டை 4-6 என்ற கணக்கில் இழந்த டிமிட்ரோவ், பின்னர் சிறப்பான ஆட்டத்தை வெளிப்படுத்தி, 6-3, 6-4 என்ற கணக்கில் அடுத்த இரு செட்களையும் வென்று அசத்தினார். விறுவிறுப்பாக நடைபெற்ற இப்போட்டியின் முடிவில், 4-6, 6-3, 6-4 என்ற கணக்கில் டிமிட்ரோவ் வெற்றி பெற்று காலிறுதிக்கு தகுதி பெற்றார்.