ஆஸ்திரேலியாவுக்‍கு எதிரான ஒருநாள் தொடரில் 2-0 என்று முன்னிலை பெற்றுள்ள இந்திய அணி, சர்வதேச ஒருநாள் கிரிக்கெட் தரவரிசையில் முதலிடத்தை பிடித்துள்ளது.

இந்தியாவில் சுற்றுப்பயணம் மேற்கொண்டுள்ள ஆஸ்திரேலியா அணி, ஒருநாள் மற்றும் 20 ஓவர் போட்டிகளில் விளையாடுகிறது. சென்னையில் நடைபெற்ற முதல் போட்டியை இந்தியா வென்ற நிலையில், கொல்கத்தாவில் நேற்று நடைபெற்ற இரண்டாவது ஒருநாள் போட்டியிலும் 50 ரன்கள் வித்தியாசத்தில் இந்தியா அபார வெற்றிபெற்றது. இதன்மூலம் ஐந்து போட்டிகள் கொண்ட தொடரை 2-க்‍கு பூஜ்ஜியம் என்ற கணக்கில் இந்திய அணி முன்னிலை வகிக்கிறது.

இந்நிலையில், சர்வதேச ஒருநாள் போட்டிக்கான தரவரிசையில் இந்தியா முதலிடத்தை பிடித்துள்ளது. முதல் இடத்தில் இருந்த தென்னாப்ரிக்காவை விட 19 புள்ளிகள் பின் தங்கியிருந்த நிலையில், நேற்றைய வெற்றியின் மூலம் இந்தியா தென்னாப்ரிக்காவை பின்னுக்கு தள்ளி முதலிடம் பிடித்து அசத்தியுள்ளது. ஏற்கனவே, டெஸ்ட் தரவரிசையிலும் இந்தியா முதலிடத்தில் உள்ளது குறிப்பிடத்தக்கது.