உலகக்கோப்பை கால்பந்து போட்டியில் போர்ச்சுக்கல் - ஸ்பெயின் அணிகளுக்கு இடையேயான ஆட்டம் டிராவில் முடிந்தது - மற்றொரு ஆட்டத்தில் மொராக்கோ அணியை வீழ்த்தியது ஈரான்
Jun 16 2018 10:23AM
எழுத்தின் அளவு:
அ +
அ -
அ
போர்ச்சுக்கல் - ஸ்பெயின் அணிகள் மோதிய உலக கோப்பை கால்பந்து லீக் போட்டி யாருக்கும் வெற்றி, தோல்வியின்றி 'டிரா'வில் முடிந்தது.
உலகக் கோப்பை கால்பந்து தொடர் ரஷியாவில் நடைபெற்று வருகிறது. 'பி' பிரிவில் இடம்பிடித்துள்ள போர்த்துகல் - ஸ்பெயின் அணிகள் மோதின. ஆட்டம் தொடங்கிய 3-வது நிமிடத்தில் போர்த்துகல் அணிக்கு ஒரு பெனால்டி வாய்ப்பு கிடைத்தது. அதில் அந்த அணியின் கேப்டனும், நட்சத்திர வீரருமான கிறிஸ்டியானோ ரொனால்டோ கோல் அடித்தார். இதனால் மூன்றாவது நிமிடத்திலேயே போர்த்துகல் அணி 1-0 என முன்னிலை பெற்றது.
அதைத்தொடர்ந்து 24-வது நிமிடத்தில் ஸ்பெயின் அணியின் தியாகோ கோஸ்டா சிறப்பான முறையில் கோல் அடித்தார். இதனால் ஆட்டம் 1-1 என சமனானது. அதன்பின் ரொனால்டோ மீண்டும் ஒரு கோல் அடித்ததால், போர்த்துகல் அணி 2-1 என முன்னிலையில் இருந்தது.
தொடர்ந்து நடைபெற்ற 2-வது பாதிநேர ஆட்டத்தில் ஸ்பெயின் அணியின் தியாகோ கோஸ்டா, நாச்சோ ஆகியோர் தலா ஒரு கோல் அடித்தனர். இதனால் ஸ்பெயின் அணி 3-2 என முன்னிலை பெற்றது.
அதன்பின் ஆட்டம் முடிய 2 நிமிடமே இருக்கும் நிலையில், கிடைத்த பிரீ-கிக் வாய்ப்பை ரொனால்டோ சரியாக பயன்படுத்தி கொண்டு கோல் அடித்தார். இதனால் ஆட்டம் மீண்டும் 3-3 என சமனானது. அதைத்தொடர்ந்து வழங்கப்பட்ட கூடுதல் நேரத்தில் எந்த கோலும் அடிக்கப்படாததால் இந்த போட்டி 3-3 என சமனில் முடிந்தது.
முன்னதாக நடைபெற்ற ஆட்டத்தில், ஈரான், மொராக்கோ அணிகள் மோதின. ஆட்டம் தொடங்கியது முதல் இரு அணி வீரர்களும் சிறப்பான ஆட்டத்தை வெளிப்படுத்தினர். இதனால் முதல்பாதி நேர ஆட்டம் கோலின்றி முடிவடைந்தது. 2-வது பாதி நேரத்திலும் இரு அணியாலும் கோல் அடிக்க முடியவில்லை. கூடுதலாக வழங்கப்பட்ட நேரத்தில், மொராக்கோ அணியின் பவுஹட்டவுஸ் தலையில் பட்ட பந்து கோலானது. இதனால் ஈரான் 1-0 என முன்னிலைப் பெற்றது.
நாளை நடைபெறும் லீக் போட்டிகளில் பிரான்ஸ் - ஆஸ்திரேலியா, அர்ஜெண்டினா - ஐஸ்லாந்து, பெரு - டென்மார்க், குரோசியா - நைஜீரியா அணிகள் பலப்பரீட்சை செய்கின்றன.