FIFA உலகக் கோப்பை கால்பந்து தகுதிச் சுற்றில் இந்தியா, வங்கதேசம் அணிகளுக்கு இடையிலான ஆட்டம் 1-1 என்ற கோல் கணக்கில் சமனில் முடிந்தது.

கத்தாரில் வரும் 2022 ஆம் ஆண்டில் உலகக் கோப்பை போட்டிகள் நடக்கின்றன. இப்போட்டிக்கு ஆசியாவில் இருந்து அணிகளைத் தேர்வு செய்வதற்கான தகுதிச் சுற்று ஆட்டங்கள் நடந்து வருகின்றன. இந்த நிலையில் தகுதிச்சுற்றில் இந்திய அணி, வங்கதேசத்தை எதிர்கொண்டது. இதில், வங்கதேச அணி தரவரிசையில் இந்தியாவைவிட 83 இடங்கள் பின்தங்கியிருந்தாலும் இந்திய அணிக்கு இந்த ஆட்டத்தில் அச்சுறுத்தலாகவே இருந்தது. தொடக்கம் முதலே துல்லியமான ஆட்டத்தை வெளிப்படுத்தி வந்த வங்கதேச அணி, ஆட்டத்தின் 42-வது நிமிடத்தில் முதல் கோல் அடித்து முன்னிலை பெற்றது. இந்த கோலை வங்கதேச வீரர் சாத் உத்தின் அடித்து அசத்தினார். இதையடுத்து, ஆட்டத்தின் 88-வது நிமிடத்தில் இந்திய வீரர் அடில் கான் ஒரு கோல் அடித்து சமன் செய்தார். இதன்பிறகு, இரண்டு அணிகளும் மேற்கொண்டு கோல் அடிக்காததால் ஆட்டம் 1-1 என்ற கோல் கணக்கிலேயே சமனில் முடிந்தது. இதன்மூலம், இந்திய அணி புள்ளிப் பட்டியலில் தற்போது 2 புள்ளிகளுடன் 4-வது இடத்தில் உள்ளது. வங்கதேசம் 1 புள்ளியுடன் 5-வது இடத்தில் உள்ளது.