பொள்ளாச்சி பாலியல் வன்கொடுமை வழக்கின் சி.பி.ஐ. விசாரணையை, உயர்நீதிமன்றம் கண்காணிக்கக் கோரிய வழக்‍கில், அடுத்த மாதம் 10ம் தேதிக்குள் பதிலளிக்க தமிழக அரசு மற்றும் சிபிஐ-க்கு சென்னை உயர்நீதிமன்றம் உத்தரவிட்டுள்ளது.

பொள்ளாச்சி பாலியல் வன்கொடுமை சம்பவம் தொடர்பாக, பாதிக்கப்பட்ட மாணவி அளித்த புகாரின் அடிப்படையிலும், அவரது சகோதரர் அளித்த புகாரின் அடிப்படையிலும் பதிவு செய்யப்பட்ட இரு வழக்குகளை, சி.பி.சி.ஐ.டி.யிடம் இருந்து சி.பி.ஐ.க்கு மாற்றி, தமிழக அரசு, கடந்த 13ம் தேதி அரசாணை பிறப்பித்தது.

இதனையடுத்து, சி.பி.ஐ. நடத்தும் விசாரணையை உயர்நீதிமன்றம் கண்காணிக்கக்‍கோரி புகழேந்தி என்ற வழக்‍கறிஞர், சென்னை உயர்நீதிமன்றத்தில் பொதுநல மனு தாக்‍கல் செய்தார். மனுவில், பாதிக்கப்பட்ட மாணவியின் பெயரை அரசாணையில் குறிப்பிட்டது, மற்ற பெண்களை புகார் அளிக்க விடாமல், மிரட்டும் வகையில் இருப்பதாக குற்றம் சாட்டப்பட்டுள்ளது.

இந்த மனு, தலைமை நீதிபதி திருமதி தஹில்ரமானி, நீதிபதி திரு.துரைசாமி ஆகியோர் அடங்கிய அமர்வு முன்பு இன்று விசாரணைக்கு வந்தது. அப்போது, சி.பி.ஐ. விசாரணையை, உயர்நீதிமன்றம் கண்காணிக்கக் கோரிய மனுவுக்கு, ஏப்ரல் 10ம் தேதிக்குள் பதிலளிக்க தமிழக அரசு மற்றும் சிபிஐ-க்கு நீதிபதிகள் உத்தரவிட்டனர்.