ராஜராஜ சோழன் குறித்து சர்ச்சைக்குரிய வகையில் பேசியது தொடர்பாக முன்ஜாமின் கோரி இயக்குநர் பா. ரஞ்சித் தொடர்ந்த வழக்கை, வரும் 21-ம் தேதிக்கு ஒத்தி வைத்து உயர்நீதிமன்ற மதுரைக்கிளை உத்தரவிட்டுள்ளது.

ராஜராஜ சோழன் குறித்து சர்ச்சைக்குரிய கருத்து தெரிவித்த இயக்குனர் பா.ரஞ்சித் மீது திருப்பனந்தாள் காவல்துறையினர் வழக்குப்பதிவு செய்துள்ளனர். இந்தநிலையில், இயக்குநர் பா. ரஞ்சித் முன் ஜாமின் வழங்கக் கோரி உயர்நீதிமன்ற மதுரைக்கிளையில் மனு தாக்கல் செய்துள்ளார். திருப்பனந்தாளில் பதிவு செய்யப்பட்ட வழக்கில் பா. ரஞ்சித்தை கைது செய்ய மாட்டோம் என அரசுத் தரப்பில் ஏற்கனவே உறுதி அளிக்கப்பட்டது. இந்த வழக்கு இன்று நீதிபதி ராஜமாணிக்கம் முன்பாக விசாரணைக்கு வந்தது. இந்த வழக்கில் தங்களையும் எதிர் மனுதாரராக சேர்க்கக் கோரி, முத்துக்குமார் என்பவர் தாக்கல் செய்த மனுவில் சில திருத்தங்கள் இருப்பதால், அதனை சரிசெய்ய கால அவகாசம் வழங்கி வழக்கை ஜுன் 21-ம் தேதிக்கு ஒத்தி வைத்தார். அதுவரை பா. ரஞ்சித்தை கைது செய்யக் கூடாது என்றும் நீதிபதி உத்தரவிட்டார்.