திரைப் பயணத்தின் 45 ஆண்டுகள் நிறைவு பெறும் நாளில், தனது ரசிகர்களுக்கு நடிகர் ரஜினிகாந்த் நன்றி தெரிவித்துள்ளார்.

நடிகர் ரஜினிகாந்த் அபூர்வ ராகங்கள் படத்தின் மூலம் தொடங்கி 45 ஆண்டுகளை நிறைவு செய்யவுள்ளதை ரசிகர்கள் கொண்டாட துவங்கி உள்ளனர். வரும் ஆகஸ்ட் 15ம் தேதி அபூர்வ ராகங்கள் படம் ரிலீசாகி 45 ஆண்டுகள் நிறைவடைய உள்ளது. அதனை கொண்டாடும் விதமாக, 45 Years Of Rajinism CDP என்ற ஹாஷ்டேக்கை டிரெண்ட் செய்து வருகின்றனர். ரஜினியின் 45 ஆண்டுகள் கொண்டாட்டத்தை முன்னிட்டு, மோகன்லால், மம்மூட்டி, சிவகார்த்திகேயன் தொடங்கி முன்னணி நடிகர்கள் ஒன்றிணைந்து போஸ்டர் ஒன்றை வெளியிட்டுள்ளனர். இந்நிலையில் நடிகர் ரஜினிகாந்த் தனது டுவிட்டர் பதிவில் வெளியிட்டுள்ள பதிவில், தன்னுடைய திரையுலகப் பயணத்தின் நாற்பத்தைந்து ஆண்டுகள் நிறைவு பெறும் இந்நாளில், தன்னை வாழ்த்திய நல் இதயங்களுக்கும், தன்னை வாழ வைக்கும் தெய்வங்களான ரசிகப் பெருமக்களுக்கு இதயம் கனிந்த நன்றி எனத் தெரிவித்துள்ளார். மேலும் நீங்கள் இல்லாமல் நான் இல்லை என தெரிவித்துள்ளார்.