பிரபல தமிழ் திரைப்பட இயக்குனர் சீனு ராமசாமி தன் உயிருக்கு ஆபத்து இருப்பதாக வெளியிட்ட ட்விட்டர் பதிவு பரபரப்பை ஏற்படுத்தியுள்ளது. இதைத்தொடர்ந்து அவர் வீட்டுக்கு போலீஸ் பாதுகாப்பு போடப்பட்டுள்ளது.

தர்மதுரை, தென்மேற்கு பருவக்காற்று போன்ற மிகச்சிறந்த படங்களை இயக்கி, தமிழ் திரையுலகில் புகழ்பெற்ற இயக்குனர்களில் ஒருவராக விளங்குபவர் சீனு ராசாமி. இவர் இன்று வெளியிட்டுள்ள ட்விட்டர் பதிவில், தன் உயிருக்கு ஆபத்து இருப்பதாக அரசு தனக்கு உதவ வேண்டும் என்றும் தெரிவித்திருந்தார். அவரது இந்த பதிவு பரபரப்பை ஏற்படுத்தியுள்ளது. இதைத்தொடர்ந்து அவரது வீட்டுக்கு காவல்துறை பாதுகாப்பு போடப்பட்டுள்ளது. இதன் தொடர்ச்சியாக செய்தியாளர்களுக்கு அவர் அளித்த பேட்டியில், கிரிக்கெட் வீரர் முரளிதரன் தொடர்பான 800 படத்தில் நடிக்க வேண்டாமென விஜய் சேதுபதியை தான் கேட்டுக்கொண்டுதாகவும், அவரது நலன் கருதியே இதனை தெரிவித்ததாக கூறினார். ஆனால் அதன் பிறகு தொலைபேசி வாயிலாகவும், சமூக வலைதளங்கள் மூலமாகவும் தனக்கு தொடர்ந்து மிரட்டல் வருவதாக தெரிவித்தார். சினிமாவில் தனக்கு அரசியல் பற்றி பேச தெரியும் என்றும், ஆனால் திரைத்துறையில் உள்ள அரசியல் தனக்கு தெரியாது என்றும் சீனு ராமசாமி அப்போது குறிப்பிட்டார்.