பவானிசாகர் அணையில் இருந்து 25 ஆயிரத்து 500 கன அடி உபரிநீர் வெளியேற்றப்படுவதால், ஆற்றின் இரு கரைகளையும் தொட்டபடி தண்ணீர் ஆர்ப்பரித்து செல்கிறது.

ஈரோடு மாவட்டத்தின் முக்கிய நீராதாரமாக விளங்கும் பவானிசாகர் அணையின் மூலம் ஈரோடு, திருப்பூர், கரூர் உள்ளிட்ட மாவட்டங்களில் உள்ள 2 லட்சத்து 47 ஆயிரம் ஏக்கர் நிலங்கள் பாசன வசதி பெறுகின்றன. தற்போது, கடந்த சில நாட்களாக நீலகிரி மாவட்டத்தில் கனமழை பெய்து வருவதால், அணைக்கு வரும் நீர்வரத்து படிப்படியாக அதிகரித்து, அணையின் முழு கொள்ளளவை எட்டியது. தற்போது 22-வது முறையாக பவானிசாகர் அணை மீண்டும் 102 அடியை எட்டியுள்ளது. அணையின் நீர்மட்டம் தனது முழு கொள்ளளவை எட்டியது அப்பகுதி விவசாயிகளை மகிழ்ச்சியில் ஆழ்த்தியுள்ளது. இதனிடையே, அணையில் இருந்து 25 ஆயிரத்து 500 கன அடி உபரிநீர் வெளியேற்றப்படுகிறது. இதன் காரணமாக சத்தியமங்கலம், பவானிசாகர் மற்றும் முடுக்கன்துறை, தொட்டம்பாளையம், புங்கார் ஆகிய கிராமங்களில் வசிக்கும் பொதுமக்களுக்கு வெள்ள அபாய எச்சரிக்கை விடுக்கப்பட்டுள்ளது.