பத்பநாபபுரம் அரண்மனையில் மன்னரின் உடைவாளை கேரளா அரசு தமிழக அரசிடம் ஒப்படைக்கும் நிகழ்ச்சியில் தமிழக - கேரளா அமைச்சர்கள் பங்கேற்றனர்.

கேரளா மாநிலம் திருவனந்தபுரத்தில் நடைபெறும் நவராத்திரி விழாவில் கன்னியாகுமரி மாவட்டத்திலிருந்து சுசீந்திரம் முன்னுதித்தநங்கை அம்மன், வேளிமலை குமாரசுவாமி, பத்பநாபபபுரம் சரஸ்வதி அம்மன் விக்​கிரகங்கள் திருவனந்தபுரத்திற்கு ஊர்வலமாக எடுத்து செல்லப்பட்டு அங்கு பத்து நாட்கள் நவராத்திரிவிழாவில் பூஜையில் வைப்பது வழக்கம். இதற்காக திருவனந்தபுரம் பத்மநாப சுவாமி கோவில் நவராத்திரி விழாவில் பங்கேற்பதற்காக கன்னியாகுமரி மாவட்டம் பத்மநாபபுரம் அரண்மனையில் இருந்து சரஸ்வதி அம்மன் உள்ளிட்ட சுவாமி விக்ரகங்கள் நெற்றி பட்டம் சூட்டிய யானைகளுடன் மன்னர்கள் கால பாரம்பரிய முறைப்படி ஊர்வலமாக சென்றது.

இதையடுத்து இன்று பத்பநாபபுரம் அரண்மனையில் மன்னர்கள் பாரம்பரிய முறைப்படி மன்னரின் உடைவாளை கேரளா அரசு தமிழக அரசிடம் ஒப்படைக்கும் உடைவாள் கைமாற்றம் நிகழ்ச்சி நடைபெற்றது. இதில் தமிழக இந்து அறநிலைத்துறை அமைச்சர் திரு. சேகர்பாபு கேரளா தேவசம்போராட்டு அமைச்சர் திரு. ராதாகிருஷ்ணன், தேவசன்போர்டு தலைவர் ​திரு. அனந்தகோபன் குமரி மாவட்ட ஆட்சியர் திரு. அரவிந்த், காவல் கண்காணிப்பாளர் திரு. ஹரிகிரண்பிரசாத் ஆகியோர் கலந்து கொண்டனர். இதனைத் தொடர்ந்து குழித்துறை மஹாதேவர் கோவிலில் தங்கும் சாமி சிலைகள், நாளை காலை தமிழக கேரளா எல்லையான களியக்காவிளையில் கேரளா அரசிடம் ஒப்படைக்கப்பட உள்ளன.