தனியார் நிறுவனங்களின் பெயர்ப்பலகை தொடர்பான வழக்கில், அறிக்கை தாக்கல் செய்யுமாறு, தொழிலாளர் நலத்துறை செயலருக்கு உயர்நீதிமன்ற மதுரைக்கிளை உத்தரவிட்டுள்ளது.

ராமநாதபுரத்தைச் சேர்ந்த வழக்கறிஞர் திருமுருகன், அரசு மற்றும் தனியார் அலுவலகங்களில், தூய தமிழில் பெயர் பலகை வைக்க வேண்டும் என்ற நீதிமன்ற உத்தரவை நடைமுறைப்படுத்தாத பண்பாட்டுத்துறை செயலர் மீது, நடவடிக்கை எடுக்க உத்தரவிட கோரி உயர்நீதிமன்ற மதுரை கிளையில் மனு தாக்கல் செய்திருந்தார். மனுவை விசாரித்த நீதிபதிகள், ஜெயச்சந்திரன் மற்றும் சுவாமிநாதன் ஆகியோர் அடங்கிய அமர்வு, தமிழ் வளர்ச்சிக்கு அனைத்து துறையினரும் கடுமையாக பாடுபட வேண்டும் என்றும், திராவிட மாடல் என்ற சொல் பரிச்சயமானாலும், மாடல் என்ற ஆங்கிலச் சொல்லிற்கு பதிலாக, முற்றிலும் தமிழிலேயே பயன்படுத்தலாமே? எனவும் நீதிபதிகள் கூறினர்.

ஆங்கிலத்தில் மட்டும் பெயர் பலகை வைத்துள்ள நிறுவனங்கள் மீது எடுக்கப்பட்ட நடவடிக்கை குறித்து, தொழிலாளர் நலத்துறை செயலர் விரிவான அறிக்கை தாக்கல் செய்ய உத்தரவிட்டு, வழக்கு விசாரணையை பிப்ரவரி 16ம் தேதிக்கு ஒத்தி வைத்தனர்.