கோவில் நிலங்களை அறநிலையத் துறையே ஆக்கிரமித்துள்ளதாக கூறப்படும் குற்றச்சாட்டு குறித்து பதிலளிக்குமாறு, இந்துசமய அறநிலையத் துறைக்கு சென்னை உயர் நீதிமன்றம் உத்தரவிட்டுள்ளது. தமிழகத்தில் உள்ள கோவில்களின் நிதியில் கல்லூரிகள் துவங்குவதை எதிர்த்தும், கோவில் நிதியை தவறாக பயன்படுத்த தடை கோரியும் டி.ஆர்.ரமேஷ் என்பவர் தாக்கல் செய்த வழக்கு, நீதிபதிகள் மகாதேவன் மற்றும் ஆதிகேசவலு அமர்வில் விசாரணைக்கு வந்தன. அப்போது, கோவில் நிதி, துறை சார்ந்த செலவுகளுக்கு பயன்படுத்துவதாகவும், திருவானைக்காவல், மதுரை மீனாட்சி அம்மன் கோவில், திருச்செந்தூர் முருகன் கோவில் நிலங்களில் அறநிலையத் துறை மண்டல இணை ஆணையர் அலுவலகங்கள் கட்டப்பட்டுள்ளதாகவும், அதற்கு எந்த வாடகையும் வழங்கப்படுவதில்லை என்றும் மனுதாரர் குறிப்பிட்டார். இதையடுத்து, மனுதாரரின் கூடுதல் மனுவுக்கு பதிலளிக்கும்படி, அறநிலையத் துறைக்கு உத்தரவிட்ட நீதிபதிகள், விசாரணையை இரண்டு வாரங்களுக்கு தள்ளிவைத்தனர்.