ராமநாதபுரம் மாவட்டம் கடலோரப் பகுதிகளில் மணிக்கு 60 கிலோமீட்டர் வரை வேகத்தில் காற்று வீசி வருவதால், ராமேஸ்வரம், பாம்பன் மற்றும் மண்டபம் பகுதிகளைச் சேர்ந்த விசைப்படகு மீனவர்கள் இன்று கடலுக்குச் செல்லவில்லை.

ராமநாதபுரம் மாவட்ட கடலோரப் பகுதிகளில் கடந்த சில நாட்களாக பலத்த காற்று வீசி வந்த நிலையில், இன்று காற்றின் வேகம் மேலும் அதிகரித்துள்ளது. மணிக்கு 50 கிலோமீட்டர் முதல் 60 கிலோமீட்டர் வரை வேகத்தில் பலத்த காற்று வீசி வருகிறது. இதனால், மீனவர்கள் யாரும் கடலுக்குச் செல்ல வேண்டாம் என மீன்வளத்துறை எச்சரிக்கை விடுத்து, டோக்கன் வழங்குவதை ரத்து செய்தது. இதனையடுத்து, இன்று ராமேஸ்வரம், பாம்பன் மற்றும் மண்டபம் பகுதிகளைச் சேர்ந்த விசைப்படகு மீனவர்கள் கடலுக்குச் செல்லாமல் படகுகளை கரையோரம் நிறுத்தி வைத்துள்ளனர். இதன் காரணமாக, ஆயிரத்து 500-க்கும் மேற்பட்ட விசைப் படகுகளும், 3 ஆயிரத்துக்கும் மேற்பட்ட நாட்டுப் படகுகளும் கரையோரமாக நிறுத்தப்பட்டுள்ளன.