விழுப்புரம் மாவட்டம் உளுந்தூர்பேட்டை அருகே தனியார் ஆம்னி பேருந்தில் தீ விபத்து ஏற்பட்டது. இதில் 42 பயணிகள் அதிர்ஷ்டவசமாக உயிர் தப்பினர்.

உளுந்தூர்பேட்டை டோல்கோட் அருகே இன்று அதிகாலை, திருச்சியில் இருந்து சென்னை நோக்கி வந்து கொண்டிருந்த தனியார் ஆம்னி பேருந்தின் பின்புறத்தில் திடீரென புகை வந்தது. இதனைக் கண்ட ஓட்டுனர், பேருந்தை நிறுத்திவிட்டு பின்புறம் சென்று பார்த்தபோது, பேருந்தில் தீப்பிடித்ததை கண்டு அதிர்ச்சியடைந்தார். இதனையடுத்து, பயணிகள் அனைவரும் அவசர அவசரமாக கீழே இறங்கினர். பேருந்து முழுவதிலும் தீ பரவி கொழுந்துவிட்டு எரிந்தது. விபத்து குறித்து தகவல் அறிந்ததும் உளுந்தூர்பேட்டை மற்றும் மங்கலம்பேட்டை ஆகிய இடங்களில் இருந்து தீயணைப்பு வீரர்கள் விரைந்து சென்று, அரை மணி நேரம் போராடி தீயை அணைத்தனர். இதனால், சென்னை-திருச்சி தேசிய நெடுஞ்சாலையில் சுமார் ஒரு மணி நேரம் போக்குவரத்து பாதிக்கப்பட்டது. தீ விபத்து குறித்து போலீசார் வழக்குப்பதிவு செய்து விசாரணை நடத்தி வருகின்றனர்.