தூத்துக்‍குடியில் சுற்றுச்சூழலுக்‍கு பாதிப்பை ஏற்படுத்தும் ஸ்டெர்லைட் ஆலையை நிரந்தரமாக மூட வலியுறுத்தி தொடர்ந்து பல்வேறு கட்டப் போரட்டங்கள் நடைபெற்றுவரும் நிலையில், நூறாவது நாளான வரும் 22-ம் தேதி அரசு அலுவலகங்களை முற்றுகையிட்டு போராட்டம் நடத்த தீர்மானிக்‍கப்பட்டுள்ளது.

தூத்துக்‍குடி ஸ்டெர்லைட் ஆலையால், சுற்றுச்சூழல் பெருமளவு பாதிக்‍கப்படுவதுடன், நிலம், நீர் மற்றும் காற்றில் மாசு ஏற்பட்டு, பொதுமக்‍கள் பல்வேறு நோய்களுக்‍கு ஆளாகி வருகின்றனர். இந்நிலையில், இந்த ஆலையை விரிவாக்‍கம் செய்ய நடவடிக்‍கை மேற்கொள்ளப்பட்டுள்ளதற்கு எதிர்ப்பு தெரிவித்தும், ஆலையை நிரந்தரமாக மூட வலியுறுத்தியும், ஆலை அருகே உள்ள குமரரெட்டியார்புர கிராமத்தினர் உட்பட 18-க்‍கும் மேற்பட்ட கிராம மக்‍கள், கடந்த 97 நாட்களாக தொடர் போராட்டம் நடத்தி வருகின்றனர். அவர்களுக்‍கு ஆதரவாக, மாணவ-மாணவிகள், அரசியல் கட்சிகளின் தலைவர்கள் உள்ளிட்ட பல்வேறு தரப்பினரும் போராட்டம் மேற்கொண்டு வருகின்றனர். இந்நிலையில், ஸ்டெர்லைட் ஆலைக்‍கு எதிரான போராட்டம் வரும் 22ம் தேதியுடன் 100-வது நாளை எட்டும் நிலையில், கிராம மக்‍கள் மற்றும் ஸ்டெர்லைட் எதிர்ப்புக்‍ குழுவினர் மாவட்ட ஆட்சியர் அலுவலகத்தை முற்றுகையிட்டு போராட்டம் நடத்த திட்டமிட்டுள்ளனர். இந்தப் போராட்டத்திற்கு அரசு மற்றும் காவல்துறை அனுமதி வழங்க மறுத்தால், மாநிலம் முழுதும் உள்ள மத்திய-மாநில அரசு அலுவலகங்களை போராட்டக்‍காரர்கள் முற்றுகையிடுவார்கள் என ஸ்டெர்லைட் எதிர்ப்பு இயக்‍கத்தினர் தெரிவித்துள்ளனர்.