கன்னியாகுமரி மாவட்டம் கோவளம் சரக்‍குப் பெட்டக மாற்று வர்த்தக துறைமுகம் அமைக்‍க ஆதரவும், எதிர்ப்பும் தெரிவித்து அறிவிக்‍கப்பட்டுள்ள ஆர்ப்பாட்டங்களுக்‍கு தடைவிதிக்‍கப்பட்டதோடு, மீனவர்களின் நடமாட்டம் கட்டுப்படுத்தப்பட்டிருப்பதற்கு எதிர்ப்பு தெரிவித்து, மீனவ கிராமங்களில் ஆயிரக்‍கணக்‍கான மீனவர்கள் சாலை மறியல் போராட்டத்தில் ஈடுபட்டதால், பதற்றம் நிலவியது.

கோவளம் சரக்‍குப் பெட்டக மாற்று வர்த்தக துறைமுகம் அமைக்‍க எதிர்ப்பு தெரிவித்து, தி.மு.க.-காங்கிரஸ் கூட்டணியும், ஆதரவு தெரிவித்து பாரதிய ஜனதா கட்சியும் இன்று ஆர்ப்பாட்டத்திற்கு அழைப்பு விடுத்திருந்தன. இதனால், சட்டம்-ஒழுங்கு பிரச்னை ஏற்படும் என்பதால், இந்த ஆர்ப்பாட்டத்திற்கு போலீசார் தடைவிதித்தனர். தடையை மீறுபவர்களை கைது செய்யும் நோக்‍கில் மாவட்ட ஆட்சியர் அலுவலகம், பேருந்து நிலையங்கள் மற்றும் முக்‍கிய சந்திப்புகளில் போலீசார் குவிக்‍கப்பட்டனர். 34 இடங்களில் சோதனைச் சாவடிகள் ஏற்படுத்தியுள்ளனர். இந்நிலையில், மீனவ கிராமங்களில் இருந்து வெளிவந்த மீனவர்களை, தடுத்து நிறுத்தியதோடு, அவர்களை கைது செய்ததாகவும் கூறப்படுகிறது. போலீசாரின் இந்த செயலைக்‍ கண்டித்து, மணக்‍குடி, பள்ளம், சங்குதுறை உள்ளிட்ட பல்வேறு மீனவ கிராமங்களைச் சேர்ந்த ஆயிரக்‍கணக்‍கான மீனவர்கள் கொளுத்தும் வெயிலையும் பொருட்படுத்தாமல், சாலை மறியல் போராட்டத்தில் ஈடுபட்டனர். இதனால், வாகன போக்‍குவரத்து முடங்கியது.