உதகை தாவரவியல் பூங்கா 122வது மலர் கண்காட்சியில் இயற்கையாக கிடைக்கும் தேவையற்ற பாசிகள், மர இலைகள், மரகட்டைகளை கொண்டு உருவாக்கபட்ட டைனோசர், மான், கங்காரு உள்ளிட்ட உருவங்கள் சுற்றுலா பயணிகளை வெகுவாக கவர்ந்தது. இதனைக்‍ காண சுற்றுலா பயணிகளின் கூட்டம் அலைமோதுகிறது.

நீலகிரி மாவட்டம் உதகை அரசு தாவரவியல் பூங்காவில் கோடை சீசனை முன்னிட்டு பிரசித்திபெற்ற 122வது மலர் கண்காட்சி நேற்று முன்தினம் துவங்கியது. இந்த கண்காட்சியில் 1 லட்சம் கார்னேசன் மலர்களால் உருவாக்கபட்ட மேட்டூர் அணை, பார்பி டால், செல்பி ஸ்பாட் போன்ற உருவங்கள் சுற்றுலாப்பயணிகளை வெகுவாகக்‍ கவர்ந்து வருகிறது. பூங்காவில் 5 லட்சம் மலர் செடிககள் நடவு செய்யப்பட்டு தற்போது அதில் வண்ண வண்ண மலர்கள் பூத்து குலுங்குகின்றன. இந்த மலா்கண்காட்சியில் நீலகிரி மாவட்டத்திலுள்ள மரங்களிலிருந்து விழுந்து வீணாகும் மர இலைகள், மர கட்டைகள், மர பாசிகளை கொண்டு அழகு பொருட்களாக தயார் செய்து காட்சிக்கு வைக்கபட்டுள்ளது. டைனோசர், மான், கங்காரு, பாம்பு, கொக்கு, கழூகு மற்றும் விதவிதமான அலங்கார பொருட்கள் கலையம்சத்துடன் வடிவமைக்‍கப்பட்டிருந்தது பலரையும் வெகுவாகக்‍ கவர்ந்துள்ளது. கடந்த 2 நாட்களில் மட்டும் 55 ஆயிரம் சுற்றுலா பயணிகள் மலர் கண்காட்சியை கண்டு களித்துள்ளனர். இன்னும் 3 நாட்களுக்‍கு இந்த மலர் கண்காட்சி நடைபெற உள்ளது.