திருவள்ளூர் அருகே செல்போன் டவர் அமைக்க ஒப்புக்‍கொண்ட நிலத்தின் உரிமையாளர் கடுமையாக தாக்‍கப்பட்டு அரசு மருத்துவமனையில் சிகிச்சைக்‍காக அனுமதிக்‍கப்பட்டுள்ளார்.

திருவள்ளூர் அடுத்த களாம் பாக்கம் கிராமத்தில் மளிகைக்‍கடை நடத்தி வரும் பிச்சைக்‍கனி என்பவர், தனக்‍கு சொந்தமான இடத்தில் தனியார் செல்போன் டவர் அமைக்‍க அந்நிறுவனத்திற்கு அனுமதியளித்து, அதற்கான பணிகள் நடைபெற்று வருகிறது. இதற்கு அப்பகுதியைச் சேர்ந்த சரவணன் என்பவர் எதிர்ப்பு தெரிவித்து தகராறில் ஈடுபட்டபோது, அதுகுறித்து காவல்நிலையத்தில் பிச்சைக்‍கனி புகார் அளித்தார். இதையடுத்து டவர் அமைக்‍கும் பணிகள் நடைபெற்றபோது, அங்கு வந்த சரவணன் மற்றும் அவரது நண்பர்கள் ஜெயபால், வேலாயுதம் ஆகியோர், பிச்சைக்கனியை உருட்டுக்கட்டையால் தாக்‍கியதில் அவர் பலத்த காயமடைந்து, அரசு மருத்துவமனையில் சிகிச்சை பெற்று வருகிறார். இதுகுறித்த புகாரின்பேரில் போலீசார் வழக்குப்பதிவு செய்து தாக்கியவர்களை தேடி வருகின்றனர்.