"சென்னையில் ஒயிலாட்டம்" என்ற தலைப்பில் ஆயிரத்து 400 ஒயிலாட்ட கலைஞர்கள் பங்கேற்ற கின்னஸ் சாதனை நிகழ்ச்சி பொதுமக்களை வெகுவாக கவர்ந்தது.

திருவள்ளூர் மாவட்டம், ஆவடியில் உள்ள தனியார் கல்லூரியில், "சென்னையில் ஒயிலாட்டம்" என்ற தலைப்பில் ஒயிலாட்ட கலைஞர்களின் கின்னஸ் சாதனை நிகழ்ச்சி நடைபெற்றது. இதில், 4 வயது முதல் 55 வயது வரை உள்ள ஆயிரத்து 418 ஒயிலாட்ட கலைஞர்கள், தமிழகம் மட்டுமின்றி, மலேசியா உள்ளிட்ட வெளிநாடுகளிலிருந்தும் ஏராளமானோர் கலந்து கொண்டு நடனமாடி கின்னஸ் சாதனை படைத்தனர்.

ஏற்கனவே 700 கலைஞர்கள் பங்கேற்று 7 நிமிடங்கள் நடனமாடியதே சாதனையாக இருந்தது. அதனை முறியடிக்கும் விதமாக ஆயிரத்து 418 ஒயிலாட்ட கலைஞர்கள் கூடி 7 நிமிடங்கள் தொடர்ந்து தமிழ் பாடல்களுக்கு நடனமாடி கின்னஸ் சாதனை படைத்தனர்.

இந்த நிகழ்ச்சியில் திரைப்பட இயக்குனர் கங்கை அமரன், இசை அமைப்பாளர் ஜேம்ஸ் வசந்தன், விஜிபி சந்தோசம், நகைச்சுவை நடிகர் தம்பி ராமையா, கவிஞர் பிறைசூடன் உள்ளிட்டோர் கலந்து கொண்டனர்.

நெல்லை டவுன் சத்தியமூர்த்தி தெருவில் உள்ள பெண்கள் அமைப்பினர் உலக அமைதி, உலக நன்மை மற்றும் சீரான மழை பெய்ய வேண்டி இந்திரனுக்கு ஒரு வாரம் பூஜை செய்து வழிபாடு நடத்தி வருகின்றனர். இவ்விழாவில் இந்திரனை வேண்டியும், முளைப்பாரி வைத்தும் கோலாட்டம் அடித்து வழிபாடு நடத்தினர். பின்னர் பெண்கள் கோலாட்டம் அடித்தபடியே முக்கிய வீதிகள் வழியாக முளைப்பாரியுடன் பசு மற்றும் கன்றுவை ஊர்வலமாக எடுத்துச் சென்று வயல் பகுதியில் கரைத்தனர். சிறுமிகள், பெண்கள் திரளானோர் கலந்து கொண்டனர்.