வறுமை காரணமாக, 20 ஆயிரம் ரூபாய்க்கு விற்கப்பட்ட திருவாரூரைச் சேர்ந்த 2 சிறுமிகளை, தனிப்படை போலீசார் மீட்டனர்.

திருவாரூர் மாவட்டம் குடவாசலைச் சேர்ந்த 11 வயது சிறுமிகள் சங்கீதா மற்றும் கவிதா ஆகிய இருவரையும், அவர்களது பாட்டி விஜயலெட்சுமி, கோவையில் செயல்படும் நூற்பாலைக்கு, தரகர்கள் மூலமாக வேலைக்கு அனுப்பி வைத்துள்ளார். இதற்காக, சிறுமி ஒருவருக்கு பத்தாயிரம் ரூபாய் வீதம் இருவருக்கும் சேர்த்து இருபதாயிரம் ரூபாயை, விஜயலட்சுமி வாங்கியதாகக் கூறப்படுகிறது. சிறுமிகளின் உறவினர் சாந்தி என்பவரிடம், தனிப்படை போலீசார் நடத்திய விசாரணையில், அவர்கள், அன்னூர் பகுதியில் செயல்படும் நூற்பாலைக்கு அனுப்பப்பட்டது தெரியவந்தது. இதையடுத்து, நூற்பாலைக்குச் சென்று, சிறுமிகள் இருவரையும் மீட்ட போலீசார், மாவட்ட குழந்தைகள் நல அலுவலரிடம் அவர்களை ஒப்படைத்தனர். வறுமை காரணமாக சிறுமிகளை வேலைக்கு அனுப்பினார்களா? அல்லது பணத்திற்காக விற்றார்களா என்பதை கண்டறிய, சிறுமிகளின் பாட்டி விஜயலட்சுமி, தரகர்கள் சகுந்தலா, கனகம் ஆகியோரிடம், போலீசார் விசாரணை நடத்தி வருகின்றனர்.