சீனாவின் கடும் எதிர்ப்பையும் மீறி தைவானுக்கு 17 ஆயிரம் கோடி ரூபாய்க்‍கு, 100 Harpoon ஏவுகணை அமைப்புகளை விற்க அமெரிக்கா ஒப்புதல் தெரிவித்துள்ளது.

தீவு நாடான தைவானை தங்கள் நாட்டின் ஒரு பகுதி என சீனா கூறி வரும் நிலையில், இது தொடர்பாக தைவானுக்கும் சீனாவுக்கும் இடையே நீண்ட காலமாக மோதல் போக்‍கு நீடித்து வருகிறது. இந்த விவகாரத்தில் மூக்‍கை நுழைத்துள்ள அமெரிக்‍கா, தைவான் நாட்டுக்கு ஏராளமான ஆயுதங்களை விற்பனை செய்து வருகிறது. இதற்கு சீனா தொடர்ந்து கடும் எதிர்ப்பு தெரிவித்து வருகிறது. ஏற்கனவே வர்த்தகம் கொரோனா வைரஸ் உள்ளிட்ட பல்வேறு விவகாரங்களில் அமெரிக்காவுக்கும் சீனாவுக்கும் இடையில் கடுமையான மோதல் நீடிக்கும் சூழலில், தற்போது தைவான் விவகாரம் மோதலை மேலும் அதிகப்படுத்தியுள்ளது.

இந்நிலையில் சீனாவின் கடும் எதிர்ப்பையும் மீறி தைவானுக்கு 100 Harpoon ஏவுகணைகள் மற்றும் அது தொடர்பான உபகரணங்களை விற்க அமெரிக்கா ஒப்புதல் தெரிவித்துள்ளது. இந்த ஒப்பந்தத்தின் மதிப்பு இந்திய மதிப்பில் சுமார் 17 ஆயிரத்து 478 கோடி ரூபாயாகும். Harpoon ஏவுகணை, கடல் பரப்பு மற்றும் நிலப்பரப்பில் உள்ள இலக்குகளைத் தாக்கும் திறன் கொண்டது. இந்த ஏவுகணை 500 பவுண்டு எடையுள்ள ஆயுதங்களை சுமக்கும் திறன் கொண்டது.