சீனாவின் கடும் எதிர்ப்பையும் மீறி தைவான் சென்றடைந்தார் அமெரிக்கா நாடாளுமன்றத் தலைவர் நான்சி பெலோசி - சிவப்பு கம்பள வரவேற்பு அளித்த தைவான் அரசு
Aug 3 2022 10:12AM
எழுத்தின் அளவு:
அ +
அ -
அ
சீனாவின் கடும் எதிர்ப்பையும் மீறி அமெரிக்கா நாடாளுமன்றத் தலைவர் நான்சி பெலோசி தைவான் சென்றடைந்தார்.
தென் கிழக்கு ஆசிய பிராந்தியத்தில் சீனா தனது ஆதிக்கத்தை நிறுவ தொடர்ந்து ராணுவ நடவடிக்கைகளை மேற்கொண்டு வருகிறது. தைவானை சீனாவின் ஒரு அங்கமாகவும், அது தனி பிராந்தியம் இல்லை என்ற நிலைப்பாட்டையும் சீனா தொடர்ந்து உலக அரங்கில் அறிவுறுத்தியுள்ளது. தைவான் பிராந்தியத்தின் தன்னாட்சி உரிமையை அமெரிக்கா துணை நின்று பாதுகாக்கும் என அமெரிக்க அரசு தொடர்ந்து கூறி வருகிறது. சமீபத்தில் அமெரிக்க அதிபர் ஜோ பைடனுடன் தொலைபேசியில் உரையாடிய சீன அதிபர் ஜி ஜிங்பிங், தைவான் விவகாரம் குறித்து சீனாவின் நிலைப்பாட்டை திட்டவட்டமாக கூறியுள்ளார். சீனாவின் ஒரு அங்கம் தான் தைவான், எனவே சீனாவின் இறையாண்மையைச் சீண்டும் செயல்களில் அமெரிக்கா ஈடுபடக்கூடாது என கேட்டு கொண்டார். தைவான் விவகாரத்தில் அமெரிக்கா நுழைவது நெருப்புடன் விளையாடுவதற்குச் சமம் என அவர் எச்சரித்ததாகக் கூறப்படுகிறது. இந்தநிலையில், அமெரிக்கா நாடாளுமன்ற தலைவரான நான்சி பெலோசி ஆசிய நாடுகளுக்கான தனது சுற்றுப்பயணத்தை நேற்றைய தினம் தொடங்கினார். தனது ஆசிய பயணத்தில் தைவான் நாட்டிற்கும் நான்சி செல்வார் என்று தெரிவிக்கப்பட்டது. சீனாவின் எதிர்ப்பையும் மீறி, நான்சி பெலோசி தற்போது தைவானுக்குச் சென்றுள்ளார். அவருக்கு அங்கு சிவப்பு கம்பள வரவேற்பு அளிக்கப்பட்டது. நான்சி வந்திறங்கிய நேரத்தில் தைவான் நீரிணை பகுதியில் சீன போர் விமானங்கள் பறப்பதால் பரபரப்பு ஏற்பட்டுள்ளது. இதனால் தைவான் பிராந்தியத்தில் பெரும் பதற்றமான சூழ்நிலை நிலவுகிறது.