பயங்கரவாத அமைப்புகளுக்கு நிதி அளிக்கப்படுவதை தடுக்காத காரணத்தால், பாகிஸ்தானை கருப்புப் பட்டியலில் சேர்க்க, நிதி நடவடிக்கை பணிக்குழு திட்டமிட்டுள்ளதாக தகவல் வெளியாகி உள்ளது.

பயங்கரவாத அமைப்புகளுக்கு நிதி அளிக்கப்படுவதை தடுக்க, 27 அடிப்படை விதிகளை, எப்.ஏ.டி.எப்., எனப்படும் நிதி நடவடிக்கை பணிக்குழு வகுத்துள்ளது. இந்த விதிகளின்படி நடவடிக்கை எடுக்க, பாகிஸ்தான் தவறி விட்டது.

இதனால், கிரே எனப்படும் இளங்கருப்பு பட்டியலில், பாகிஸ்தான் சேர்க்கப்பட்டுள்ளது. பயங்கரவாத அமைப்புகளுக்கு நிதி வழங்குவதை தடுக்க நடவடிக்கை எடுக்காத பாகிஸ்தானை, கருப்புப் பட்டியலில் சேர்க்க, நிதி நடவடிக்கை பணிக்குழு திட்டமிட்டு உள்ளதாக கூறப்படுகிறது. இது குறித்து ஆலோசிப்பதற்காக, பிரான்ஸ் தலைநகர் பாரீசில், அடுத்த மாதம் நிதி நடவடிக்கை பணிக்குழு கூட்டம் நடைபெற உள்ளது.

பாகிஸ்தானை கிரே பட்டியலில் ‍சேர்த்து ஓராண்டாகும் நிலையில், கடந்த ஜூலை மாதத்தில், பயங்கரவாதத்திற்கு நிதி அளித்ததாக, அந்நாட்டின் மீது மட்டும் 23 வழக்குகள் செய்யப்பட்டுள்ளது குறிப்பிடத்தக்கது.