நாட்டிலேயே முதல்முறையாக தமிழகம் முழுவதும் உள்ள அரசு மருத்துவமனை மற்றும் மருத்துவக் கல்லூரி மருத்துவமனைகளில் முதியோர்களுக்கான மனநல சிறப்பு சிகிச்சை மையங்கள் தொடங்கப்படும் என தமிழக அரசு தெரிவித்துள்ளது.

மனநல மருத்துவர்களுக்கான சிறப்பு பயிற்சி முகாம் சென்னையில் இன்று தொடங்கியுள்ளது. இதில், அனைத்து மாவட்டங்களில் பணியாற்றும் மனநல மருத்துவர்கள், உளவியலாளர்கள், சமூக ஆர்வலர்கள் பங்கேற்றுள்ளனர். பயிற்சி முகாமை மக்கள் நல்வாழ்வுத்துறை அமைச்சர் டாக்டர் சி. விஜயபாஸ்கர் தொடங்கிவைத்து பயிற்சி கையேட்டினை வெளியிட்டார். அப்போது பேசிய அவர், மனநலம் பாதிக்கப்பட்டுள்ளவர்களுக்கு உரிய சிகிச்சை வழங்க வழிவகை செய்யப்பட்டுள்ளதாக கூறினார். இந்தியாவிலேயே முதல்முறையாக தமிழகத்தில் உள்ள அனைத்து அரசு மருத்துவமனைகள், மருத்துவக் கல்லூரி மருத்துவமனைகளில் மக்களின் முதல்வர் செல்வி ஜெயலலிதா வழிகாட்டுதலின் பேரில், முதியோர்களுக்கான சிறப்பு மனநல சிகிச்சை மையங்கள் தொடங்க ஏற்பாடு செய்யப்பட்டு வருவதாக அமைச்சர் தெரிவித்தார்.