டி.என்.பி.எஸ்.சி தேர்வு முறைகேடு வழக்கில், பணம் கொடுத்து தேர்ச்சி பெற்றதாக கைது செய்யப்பட்டுள்ள விழுப்புரத்தை சேர்ந்த சிவராஜ், விக்னேஷ் ஆகியோரின் ஜாமீன் மனுவை, சென்னை முதன்மை அமர்வு நீதிமன்றம் தள்ளுபடி செய்துள்ளது.

தமிழ்நாடு அரசுப் பணியாளர் தேர்வாணையம் நடத்திய குரூப்-4, குரூப்-2ஏ, கிராம நிர்வாக அதிகாரிக்கான தேர்வுகளில் நடைபெற்ற முறைகேடுகள் தொடர்பாக சி.பி.சி.ஐ.டி. போலீசார் தனித்தனியாக வழக்குகள் பதிவு செய்து விசாரணை நடத்தி வருகின்றனர். இடைத்தரகராக செயல்பட்ட ஜெயகுமார், காவலர் சித்தாண்டி உள்ளிட்டோர் கைது செய்யப்பட்டுள்ளனர்.

குரூப் 4 தேர்வை சர்ச்சைக்குரிய ராமேஸ்வரம் தேர்வு மையத்தில் எழுதி, இடைத்தரகருக்கு தலா ஏழரை லட்சம் கொடுத்து வெற்றி பெற்றதாகக் கைது செய்யப்பட்ட விழுப்புரத்தை சேர்ந்த சிவராஜ், விக்னேஷ் ஆகிய இருவரும், ஜாமீன் கோரி சென்னை முதன்மை அமர்வு நீதிமன்றத்தில் மனுக்கள் தாக்கல் செய்தனர். ஜாமீன் வழங்கினால் வழக்கின் விசாரணையை பாதிக்கும் என்ற அரசுத் தரப்பு வழக்கறிஞரின் வாதத்தை ஏற்ற நீதிபதி செல்வகுமார், இருவருக்கும் ஜாமீன் வழங்க மறுத்து, அவர்களின் மனுக்களை தள்ளுபடி செய்து உத்தரவிட்டார்.