போலி பட்டா வழங்கிய விவகாரம் தொடர்பாக, மதுரையில், தலையிடத்து துணை வட்டாட்சியரை, நில அபகரிப்பு பிரிவு காவல்துறையினர் கைது செய்தனர். மதுரை மாநகர் பல்லவி நகரைச் சேர்ந்த கோபிலால் என்பவருக்‍கு சொந்தமாக ஆனையூர் பகுதியில் உள்ள நிலத்திற்கு ராஜா செல்வராஜ் என்பவர் போலி பட்டா வாங்கியுள்ளார். இதுகுறித்து கோபிலால் கடந்த 2021ம் ஆண்டு புகார் அளித்ததன் பேரில், போலீசார் விசாரணை மேற்கொண்டனர். ராஜா செல்வராஜ், தனது தந்தையின் பெயர் ஒற்றுமையைப் பயன்படுத்தி போலி பட்டா பெற்றுள்ளதும், அவருக்‍கு அப்போது துணை வட்டாட்சியராக இருந்த, தற்போது மதுரை மேற்கு தலைமையிடத்து மண்டல துணை வட்டாட்சியராக உள்ள மீனாட்சிசுந்தரம் என்பவர் பட்டா வழங்கியுள்ளதும் விசாரணையில் தெரியவந்தது. இதனைத் தொடர்ந்து போலீசார் வழக்குப்பதிவு செய்தநிலையில், தலைமறைவாக இருந்த தலைமையிடத்து துணை வட்டாட்சியர் மீனாட்சி சுந்தரத்தை மதுரை கடச்சனேந்தல் பகுதியில், நில அபகரிப்பு பிரிவு போலீசார் கைது செய்தனர்.